Keler jyldan barlyq aýyldyq okrýgte tórtinshi deńgeıli bıýdjet qalyptasady

Qazaqstan Respýblıkasynyń Tuńǵysh Prezıdentiniń «100 naqty qadam» Ult josparyndaǵy tapsyrmasyn oryndaý maqsatynda ótken jyldyń qańtar aıynan bastap oblystaǵy 114 aýyldyq okrýgte tórtinshi deńgeıli bıýdjet engizildi, dep jazady Qamshy.kz aqparat agenttigi. 

Tórtinshi nemese derbes bıýdjet dep atalatyn bıýdjettiń bul túri halqynyń sany 2 myńnan asatyn aýyldyq okrýgterge engiziledi. Máselen ótken jyly derbes bıýdjeti qalyptasqan 114 aýyldyq okrýgtiń kiris jospary 12 mıllıard 400 mıllıon teńge somasynda bekitildi. Jyl sońyna bul jospar asyra oryndalyp, bul aýyldyq okrýgterdiń jalpy bıýdjeti 12 mıllıard 700 mıllıon teńge boldy. Sáıkesinshe aýyldyq okrýg ákimderiniń basqarýyna berilgen bul qarjynyń esebinen eldi mekenderdiń ajaryn ashyp, áleýmettik jaǵdaıyn jaqsartý maqsatynda 786 is shara ótkizildi. Bul maqsatqa 1 mıllıard 700 mıllıon teńge qarjy da qarastyryldy.

–Al bıyl derbes bıýdjet engizilgen 114 okrýgtiń kiris jospary 12 mıllıard 700 mıllıon teńge kóleminde bekitildi. Sáıkesinshe esepti kezeńde jospar 2,9 paıyzǵa artyq oryndalyp otyr. Onyń ishinde ózindik kirister 131,4 paıyzǵa oryndaldy. Keler jyldyń 1 qańtarynan bastap oblystyń qalǵan 42 aýyldyq okrýgterinde bıýdjettiń 4 deńgeıi engiziletin bolady. Sol arqyly derbes bıýdjet oblys aýmaǵyndaǵy barlyq aýyldyq okrýgte qalyptaspaq. Derbes bıýdjetti qalyptastyrý, ony qoldanysqa berý baǵytynda barlyq aýdandarda is-sharalar jospary ázirlenip, aýdan ákimderimen bekitilgen. Atalǵan is-sharalar josparyna saı aýyldyq okrýg ákimderiniń ǵımaratyn tıisti keńse tehnıkalarymen qamtamasyz etý josparlanyp otyr. Sondaı-aq tórtinshi bıýdjetti qalyptastyrýshy, oǵan baqylaý jasaýshy mekemeler «E-halyq» , «1S-Mekeme» kompıýterlik baǵdarlamasymen qamtamasyz etilgen. Aýyldyq okrýgterdegi ákimdik ǵımarattarynda 512 kbıt/s tómen emes ınternet baılanys jáne «Qazynashylyq-Klıent» aqparattyq júıeleri ornatylýda. Al esepshi mamandardyń jańa aqparattyq júıesinde jumys isteýine daıynyq jumystary júrgizilip jatyr, –deıdi oblys ákimdiginiń ekonomıka jáne bıýdjetti josparlaý basqarmasynyń basshysy Gúldana Jaýynbekova.

«100 naqty qadam» Ult josparyna saı derbes bıýdjeti bar okrýg ákimderi birqatar salyqtyq túsimderden jınalǵan qarjyny aýyldaǵy ózekti máselelerdi sheshý jumsaı alatyn bolady.