9 jylda 1747 jas aýylda eńbek etýge attandy

Qazaqstan Rspýblıkasy Tuńǵysh Prezıdenti-Elbasy Nursultan Nazarbaevtyń bastamasymen qolǵa alynǵan «Dıplommen aýylǵa» jobasy júzege asyryla bastaǵannan bergi 9 jyl ishinde oblystyń shalǵaı eldi mekenderine 1747 jas maman kelgen. Búginde olardyń 1618-i aýyldy jerde qyzmet etýin jalǵastyryp jatyr, dep jazady Qamshy.kz aqparat agenttigi. 

2010-2019 jyldar aralyǵynda «Dıplommen aýylǵa» jobasy aıasynda óńirge kelgen 1747 jas maman 4 mıllıar 961mıllıon 600 myń teńge kóleminde nesıe alǵan. Mundaǵy 1618 jas aýyldyq jerde qyzmet etýdi jalǵastyryp jatyr. Onyń ishinde bilim salasy mamandarynyń sany 1048-di qurasa, 349 maman jergilikti jerdegi densaýlyq saqtaý salasyn ilgeriletý jolynda ter tógýde.

Al aǵymdaǵy jyly 256 mamanǵa turǵyn úı satyp alýǵa nesıe berýge 969 mıllıon 600 myń teńge qarastyrylǵan. Jyl basynan bergi aralyqta 233 mamanǵa 843 mıllıon 600 teńge bıýdjettik kredıtter berildi.

–Aýdandar bólinisinde turǵyn úı satyp alýǵa qajetti nesıeni qarjylandyrýǵa Shý aýdanynda 53 jas maman ótinish berip, olarǵa 200 mıllıon 700 myń teńge kóleminde nesıe berilgen. Sondaı-aq T.Rysqulov aýdanynda 37 maman 140 mıllıon 100 myń teńge kóleminde nesıe alsa, Qordaı aýdanynda 35 maman 129 mıllıon 200 myń teńge nesıe taǵaıyndaldy. Munan bólek jergilikti bıýdjet esebinen 655 mamanǵa birjolǵy kóterme járdemaqysyn tóleýge 123 mıllıon 7 myń teńge qarastyryldy. Esepti kezeńde 477 mamanǵa 90 mıllıon 900 myń teńge nesıe berildi, –deıdi oblys ákimdigi ekonomıka jáne bıýdjetti josparlaý basqarmasynyń basshysy Gúldana Jaýynbekova.

Jalpy, aýyldaǵy áleýmettik saladaǵy asa qajetti mamandar tapshylyǵyn joıý maqsatynda qolǵa alynǵan «Dıplommen aýylǵa» baǵdarlamasynyń múmkindigin jambyldyq jastar joǵary dárejede sezinýde. Olar qajetti tólemder men áleýmettik qoldaýlarǵa ıe bola otyryp, jergilikti turǵyndarǵa sapaly qyzmet usynyp keledi. Jas mamandardyń aýyldarda eńbek etýimen ondaǵy bilim sapasy men medısınalyq qyzmet sapasy da eselep artty. Bastysy bul baǵdarlama qolynda dıplomy bar, joǵary bilimdi jastardyń jumyssyz qalmaýyna múmkindik berdi. Al tájirıbesiz jas mamandar osy baǵdarlama arqyly aýylǵa kelip mol tájirıbe jınaqtap, kásiptik ósý jolyndaǵy alǵashqy qadamyn bastaıdy.