Nesıe paıyzy tómendeýi múmkin

Sottarda qaralatyn barlyq azamattyq istiń 40 prosentten astamy - bankterge qatysty daý. Bul - óte joǵary kórsetkish. Jyl saıyn olardyń sany artpasa kemıtin túri joq. Bul týraly 16 qarashada Joǵarǵy Sot janyndaǵy Halyqaralyq keńestiń otyrysynda Joǵarǵy Sot tóraǵasy Jaqyp Asanov málimdedi dep jazady Qamshy.kz aqparat agenttigi zakon.kz saıtynyń deregin negizge alyp. 

Ol bul máseleni bankter óz tutynýshysyna nesıe alýdaǵy qaýip-qater táýekelderin durystap túsindirip, ony qujat túrinde kórsetý arqyly sheshýge bolatynyn aıtty: 

– Al men osy bankter mańaıyndaǵy daýdy azaıtýdyń basqa joldaryn usynamyn.

Birinshiden, Reseıdegi sııaqty qaryz alýshy men bankterdiń barlyq quqyqtary men mindetteri egjeı-tegjeıli sıpattalǵan "Tutynýshylyq nesıe týraly" zań qabyldaý qajet. Árıne, zań azamattardy qorǵaýǵa baǵyttalýy kerek. Mine, osyndaı zań kóptegen qaýip pen táýekelderdiń aldyn alýy múmkin.

Ekinshiden, nesıeniń paıyzdyq syıaqy mólsherlemesiniń shekti kólemin shuǵyl tómendetý qajet.

QR Ulttyq bank basqarmasy 2012 jylǵy 24 jeltoqsanda "Jyldyq tıimdi paıyzdyq mólsherlemeler lımıtin bekitý týraly" № 377 qaýlysyn qabyldady, onda eń joǵary paıyzdyq mólsherleme 56% dep kórsetilgen.

Biraq Ulttyq bank shekti mólsherlemeniń esebin eseptep kórsetpegen.

QR Azamattyq kodeksiniń 718-babynyń 2-tarmaǵyna sáıkes, jyldyq tıimdi syıaqy mólsherlemesiniń eń joǵary mólsheri Qazaqstan Respýblıkasynyń belgili bir zańnamalarynda belgilengen tártippen esepteledi. Osy normany buza otyryp, Ulttyq bank eń joǵary syıaqy mólsherlemesi kóleminiń esebin júrgizbegen, biraq 56% degen negizsiz mólsherlemeni aspannan alyp, bekite salǵan.

Qaýlyda 56% syıaqy stavkasynyń qalaı qurylǵanyn, qaıdan alynǵanyn kórsetetin bir de bir málimet joq.

Tipti, Ulttyq bank osy stavkany eseptep shyǵarǵan dep boljasaq ta, ol jyl saıyn ózgerip otyrýy tıis emes pe? О́ıtkeni el ekonomıkasynyń jáne áleýmettik kórsetkishteri únemi ózgerip otyrady. Endi 7 jyl ishinde stavka ózgermeýi múmkin emes qoı!

Tarıftiń eseptelmegendiginiń taǵy bir dáleli - Ulttyq banktiń qararynda bul mólsherlemeniń BEKITILDI dep kórsetilýi, al zańǵa sáıkes ony Anyqtaý kerek. Bul áreketterdiń aıyrmashylyǵyn atap óter bolsaq, ádette, bir nárse týraly bireý sheshim shyǵarsa, ol bekitiledi, al "anyqtaý" - belgili bir esepteýdi bildiredi.

Jaqynda men Ulttyq banktiń ústinen sotqa shaǵym túsirdim. Sot Ulttyq banktiń eń joǵary paıyzdyq mólsherlemeniń esebin jasasyn dep úkim shyǵarýy úshin. Menińshe, sot ol shaǵymymdy qanaǵattandyrýy tıis. Mine, sol kezde nesıeniń paıyzdyq stavkasy qazirgideı 56% emes, 25-30% aralyǵynda bolyp qalady.

Sondaı-aq QR Parlamentine "Tutynýshylyq nesıe týraly" zań jobasyn ázirleý týraly usynys túsirdim.