Almatyda týrıstik polısııa shtaty ulǵaıtylady

QR Ishki ister mınıstri Erlan Turǵymbaev pen Almaty qalasynyń ákimi Baqytjan Saǵyntaevtyń qatysýymen jol qozǵalysy mádenıetin arttyrý, týrıstik polısııa shtatyn ulǵaıtý máseleleri boıynsha jıyn ótti, dep habarlaıdy IIM baspasóz qyzmeti.

Barlyq iri qalalarda kóshi-qon ortalyqtary quryldy, al sheteldik qonaqtar men týrıstermen jumys isteý boıynsha polısııanyń jekelegen bólimsheleri mamandandyrylyp, olardyń qyzmeti eldiń kórnekti oryndary men kýrorttarynda, mádenı obektilerde týrısterdiń qaýipsizdigin qamtamasyz etýge, habardar etýge, olarǵa keńes berýge baǵyttalǵan.

«Osyny eskere otyryp, týrıstik polısııa shtatyn ulǵaıtý jáne sheteldikter jıi baratyn jerlerde onyń jańa pýnktterin ornatý josparlanýda. Sonymen qatar osy qyzmetti materıaldyq-tehnıkalyq jaraqtandyrýdy jaqsartý máselesi qarastyrylýda» – dedi Erlan Turǵymbaev Mınıstr Almatyny mysalǵa keltire otyryp: «Eger qala boıynsha alsańyz, onda osyndaı polısııa pýnktin kún saıyn júzedegen sheteldikter kelip túsip jatatyn halyqaralyq áýejaı aýmaǵynda ornalastyrý qajet. Olardyń keıbiri polısııanyń bilikti kómegin qajet etedi, sondyqtan polıseıdiń shet tilderin erkin meńgerýi jáne kómek kórsetýge quzyrly bolýy óte mańyzdy» – dedi.