Bilimdi bala kórikti

Búginde bilim salasyna baǵyttalǵan salalyq baǵdarlamalar az emes. Olardyń deni bilim júıesin jetildirip ǵana qoımaı, ult tárbıesi men urpaq keleshegine baǵyttalǵan. Mine sondaı búgingi býyn tárbıesin tereńnen qaýzaǵan, ári Elbasynyń «Rýhanı jańǵyrý» baǵdarlamasymen ushtasqan sharalardyń biri Taraz qalasyndaǵy «Bilim» kolledjinde uıymdastyryldy, dep jazady Qamshy.kz aqparat agenttigi. 

«Qoǵamdyq kelisim» mekemesinde ótken basqosýǵa Jambyl oblysy ákimdiginiń bilim basqarmasy basshysynyń orynbasary Talǵat Jamalov, «Úsh baılyq» qoǵamdyq birlestiginiń basshysy Orazkúl Asanǵazyqyzy qatysyp, oramdy oılaryn ortaǵa saldy. Qoǵam qaıratkeri ulttyq kod pen tektilik jóninde áńgimesin órbitip, qyz tárbıesindegi basty qundylyqtarǵa keńinen toqtaldy. – Elbasy: «Men qazaqstandyqtardyń eshqashan buljymaıtyn eki erejeni túsinip, baıybyna barǵanyn qalaımyn. Birinshisi – ulttyq kod, ulttyq mádenıet saqtalmasa, eshqandaı jańǵyrý bolmaıdy. Ekinshisi – alǵa basý úshin ulttyń damýyna kedergi bolatyn ótkenniń kertartpa tustarynan bas tartý kerek», – dep atap ótken bolatyn. Qazirgi tańda keıbir boıjetkenderimiz keshki ýaqytta kóshede júrýdi sánge aınaldyryp bara ma, qalaı ózi? Qydyrmasyn demeımiz, árıne. Qydyrsyn. Degenmen kóshede keshkilik ýaqytta serýen qurǵandy azaıtý kerek. Sonyń saldarynan qyzdarymyz ashy sýdyń arbaýyna túsip, shylym shegip, túngi klýbtardyń esigin baqqanyn kórgende júregiń aýyrady. Ásili, keshkilik kóshede júrgenderdiń ońǵanyn kórgenimiz joq. Osyndaı jeńil minezdiń saldarynan júkti bolyp, tastandy balalardyń kóbeıip jatqany da alańdatady. Osynyń bári de ózimizdiń qarakóz qyzdarymyz, eldiń erteńgi bolashaq analary emes pe?! Oılanaıyqshy, olardyń erteńgi taǵdyry ne bolady? Bulardan ónegeli urpaq kútýge bola ma? Almaǵaıyp zamanda biz arymyz ben uıatymyzdy joǵary qoıýymyz kerek. Aq bosaǵany attap, nekeńdi qıdyryp, ata-anańnyń razylyǵyn alyp, beti ashylyp jar bolǵan qyzdyń qaı ortada bolsyn abyroıy bıik bolady. San túrli sıqyrǵa aldanyp, jigitterdiń jeteginen ustamaý kerek. Sondyqtan otbasynda ákeniń tárbıesi bolýy kerek. Ákesine erkelep, ony syılap ósken boıjetken jat júriske jol bermeıdi, – dedi Orazkúl Asanǵazyqyzy. Ashyq, erkin formatta ótken kezdesýde stýdentter Orazkúl Asanǵazyqyzyna kókeıdegi saýaldaryn qoıdy.