Dárigerlerdiń eńbekaqysy 30 paıyzǵa ósedi

Dárigerlerdiń jalaqysy 30 paıyzǵa ósedi. Bul týraly búgin Úkimet otyrysynda QR Densaýlyq saqtaý mınıstri Eljan Birtanov aıtty, – dep Qamshy.kz aqparat agenttigi habarlaıdy.

Mınıstrdiń málimdeýinshe, 2020 jyly 1 qańtardan bastap elimizde Mindetti áleýmettik medısınalyq saqtandyrý júıesi iske qosylady. Osyǵan oraı, júıeniń daıyndyq deńgeıin tekserý maqsatynda 1 qyrkúıekten bastap Qaraǵandy oblysynda medısınalyq saqtandyrý pılottyq túrde iske qosyldy. Onyń negizgi maqsaty – medısınalyq qyzmetti alýshylardyń "saqtandyrylý" statýsyn sáıkestendirý, tegin medısınalyq kómektiń kólemindegi jáne medısınalyq saqtandyrý júıesindegi qyzmetterdi jeke-jeke esepke alý ıaǵnı 2020 jyldan bastap medısınalyq saqtandyrý júıesin tolyǵymen engizý maqsatynda daıyndyq jumystaryn júrgizý bolyp tabylady.

Jobany iske asyrý úshin bıýdjetten qosymsha 2,3 mlrd teńge, onyń ishinde profılaktıkalyq qarap-tekserý men konsýltasııalyq-dıagnostıkalyq qyzmetterdiń qoljetimdiligin joǵarylatýǵa 1,7 mlrd teńge, medısınalyq ońaltýdy keńeıtýge 600 mln teńgege jýyq qarajat bólindi.

"Pılottyń operatıvtik derekteri boıynsha eki aıdyń ishinde óńirde qymbat turatyn kompıýterlik tomografııa jáne magnıttik-rezonansty tomografııa qyzmetteriniń sany – 178, medısınalyq ońaltý qyzmetteri – 73 jáne konsýltasııalyq-dıagnostıkalyq kómek qyzmetteri 42 paıyzǵa ulǵaıdy", – dedi mınıstr.

Onyń aıtýynsha, halyq qajettiliginiń negizinde ońaltýdy qosa alǵanda, medısınalyq kómektiń basym túrlerin qarjylandyrý kelesi jyly 7 esege jáne 2025 jylǵa qaraı 11 esege deıin ósedi. Tarıfterdiń ósýi medısına qyzmetkerleriniń jalaqysyn arttyrýǵa múmkindik beredi. Kelesi jyly dárigerlerdiń eńbekaqysy 30 jáne orta medısına personalynyń eńbekaqysy 20 paıyzǵa ulǵaıady.