Almaty jalpyqalalyq dızaın kodqa ótedi

Almaty ákimdiginde ótken baspasóz máslıhatynda qala josparlaý jáne ýrbanıstıka basqarmasynyń basshysy Almashan Ahmedjanov qalalyq dızaın kodqa aýysý týraly aıtty.

Dızaın-kod Almatydaǵy ár ǵımaratty saqtaýǵa, uqypty ustaýǵa baǵyttalǵan.

– Tujyrymdamaǵa negiz retinde kanadalyq qala qurylysyn retteý júıesi alyndy. Eger úıdiń qasbetin ózgertý kerek bolsa, belgili bir talapqa saı ózgertetin bolady. Álbette, adamdardyń bári ǵımaratty ustap otyrýǵa aqsha tóleıtini ras. Olarǵa baryp terezeńdi, qasbetińdi aýystyr dep eshkim májbúrlemeıtin bolady, – dedi Almashan Ahmedjanov.

Onyń aıtýynsha, baspana ıelerine tańdaý beriledi.

– Eger adam sary úıdiń balkonyn kókke boıaǵysy kelse, oǵan dızaın kodtaǵy talapty kórsetemiz. Turǵyndar ózin-ózi baqylaıtyn júıe bolady. Ǵımarattardy ustap turý men paıdalaný salasynda birqatar bızneste ósim bolady dep senemiz, – dedi A.Ahmedjanov.