Almatyda múgedekterdi áleýmettik qorǵaý máseleleri talqylandy

Almatyda QR Premer-Mınıstriniń orynbasary Berdibek Saparbaevtyń qatysýymen múgedekterdi áleýmettik qorǵaý salasyndaǵy Úılestirý keńesiniń otyrysy ótti, dep jazady ákimdiktiń baspasóz qyzmeti.

Alqaly sharaǵa eńbek jáne halyqty áleýmettik qorǵaý mınıstri Birjan Nurymbetov, balalar quqyqtary jónindegi ýákil Arýjan Saın, ortalyq jáne jergilikti atqarýshy memlekettik organdar, úkimettik emes sektordyń ókilderi, múgedekterdiń qoǵamdyq birlestikteriniń músheleri men ońaltýdyń tehnıkalyq quraldaryn óndirýshiler qatysty.

Otyrysqa qatysýshylar shara bastalar aldynda Almaty ákimdiginiń ǵımaratynda uıymdastyrylǵan múgedekterdi ońaltýdyń tehnıkalyq quraldarynyń kórmesin aralap kórdi.

«Qazaqstanda shamamen 690 myń múgedek turady, olardyń 90 myńǵa jýyǵy balalar. Osy jyldyń mamyr aıynda múgedekterdiń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deıin ulttyq jospar qabyldandy. Ulttyq jospardyń mindetteriniń biri – jumyspen qamtamasyz etý. Búgingi tańda múgedekterdiń 67 paıyzy, ıaǵnı 424 myń adam eńbekke qabiletti jasta. Alaıda, onyń tek 106,5 myńy nemese 25 paıyzy ǵana eńbekke tartylǵan. Jumys berýshiler múgedekterdi jumysqa ornalastyrý kvotasyn oryndamaı otyr», - dep atap ótti B. Saparbaev.

Osyǵan baılanysty ol múmkindigi shekteýli azamattardyń ómiri men jumysyna qolaıly jaǵdaı týǵyzý úshin memleket pen bıznestiń kúsh-jigerin birlesip jumsaýǵa shaqyrdy.

Eńbek mınıstri B.Nurymbetov ekonomıkalyq yntymaqtastyq pen damý uıymy (EYDU) elderinde múgedekterdi jumysqa ornalastyrý deńgeıi shamamen 40 paıyzdy quraıtynyn atap ótti. «Eńbek» memlekettik baǵdarlamasy aıasynda 47 myń múmkindigi shekteýli adamǵa qoldaý kórsetildi, onyń ishinde 40 myń adam jumysqa ornalastyryldy, 900 mıkrokredıt berildi.

«2020-2021 jyldary bul kórsetkishti 30 paıyzǵa jetkizý mindeti tur. Ol úshin qosymsha 20 myń adamdy jumyspen qamtý qajet», - dep atap ótti B. Nurymbetov

Bulardan ózge, múgedektiktiń aldyn-alý, olardy kásipkerlikke tartý, ońaltý ortalyqtaryn qurý, bilim alýǵa, áleýmettik mańyzdy nysandarǵa qoljetimdilik, áleýmettik qyzmetter portalyn qurý, ońaltý quraldarymen qamtamasyz etý jáne basqa da máseleler qaraldy.

Dál osy kúni Premer-Mınıstrdiń orynbasary B. Saparbaev, aqparat jáne qoǵamdyq damý mınıstri Dáýren Abaev, bilim jáne ǵylym mınıstri Ashat Aımaǵambetov jáne Almaty ákiminiń orynbasary Erjan Babaqumarov jastardyń «Men jastarǵa senemin!» respýblıkalyq forýmyna qatysty.