Almatyda jyl sońyna deıin jastarǵa arnalyp 1000 páter bólinedi

Almaty ákimdiginiń baspasóz ortalyǵynda Qazaqstan Respýblıkasynyń Tuńǵysh Prezıdenti – Elbasynyń tapsyrmasy boıynsha satyp alý quqyǵynsyz jumys jasaıtyn jastarǵa jalǵa beriletin turǵyn úıler týraly brıfıng ótti, dep jazady ákimdiktiń resmı saıty.

Qazaqstan Respýblıkasy Úkimetiniń 2018 jylǵy 22 maýsymdaǵy №372 qaýlysymen bekitilgen «Nurly jer» turǵyn úı qurylysy Memlekettik baǵdarlamasynyń 3 tarmaǵy men 5.1 tarmaǵynda jumys jasaıtyn jastarǵa satyp alý quqyǵynsyz jalǵa páter alý úshin qoıylatyn talaptar kórsetilgen.

Almaty qalasy Turǵyn úı saıasaty basqarmasy basshysynyń orynbasary Aıbek Saıdeldaev jalǵa páter berýdiń birinshi pýlynda Alataý aýdanynyń Kókqaınar yqshamaýdanynda ornalasqan 249 páterge ótinish qabyldaý 30 qazan men 12 qarashada júrgizilgenin atap ótti.

Jumys jasaıtyn jastardan ótinish pen qujattardy qabyldaý úshin arnaıy www.almaty-jastary.kz saıty ashyldy. Búgingi kúnge deıin atalǵan saıtqa 1244 ótinish túsken.

Aıbek Saıdeldaev qazirgi kezde jalǵa úı berýdiń bekitilgen erejesi boıynsha qujattardyń tolyqtyǵy men sáıkestigine, balldardy esepteýge jáne jalǵa páter alatyn úmitkerlerdiń tizimin jasaýǵa qatysty jumystardyń júrip jatqanyn aıtty.

Ball esepteý balldyq júıe boıynsha atqarylady:

1) О́tinish berýshi mamandyq naryǵynyń tizimi boıynsha óte qajet 100 (júz) mamandyqtyń Qazaqstan Respýblıkasynyń Úkimeti 2018 jyly 13 qarashada №746 qaýlysymen bekitken «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyna sáıkes quzyrly organ bekitken mamandyqtyń birin ıgerse – 10 ball;

2) Otbasy bolsa – 5 ball, nekede turǵan ár jyly úshin – 2 ball;

3) 1 (bir) balasy bolsa – 1 ball, odan keıingi ár bala úshin – 2 ball;

4) kemdegende 1 jyl ishinde kásipkerlikpen aınalyssa – 5 ball, ár jyl úshin – 1 ball;

5) ótinish berýshiniń ár saladaǵy jeke jetistigi úshin – 2 ball;

6) bıýdjettik uıymdarda atqarǵan qyzmeti (memlekettik mekemeler men memlekettik kásiporyndar) úshin – 5 ball, ótiliniń ár jyly úshin – 1 ball;

7) ekinshi deńgeıli bankterde jınaqtaýshy esebi (depozıtter) bolsa – 2 ball.

Balldar teń bolǵan jaǵdaıda kórsetilgen merzim boıynsha ótinishti erte bergen úmitkerge basymdyq beriledi.

Jınaqtalǵan balldar eseptelgen soń saıtta baǵdarlamaǵa qatysýshylardyń jalpy tizimi jarııalanady, odan soń jalǵa páter alýǵa ótinish bergen ári joǵary ball jınaǵan úmitkerlermen turǵyn úıdi jalǵa berý týraly kelisim – shart jasalady.

Brıfıng barysynda Aıbek Saıdeldaev aǵymdaǵy jyldyń sońyna deıin taǵy 1000 páter bólinetindigin, atalǵan baǵdarlama boıynsha ótinish qabyldaý odan ári jalǵasatynyn atap ótti.