Kontrabandalyq arnany uıymdastyrǵan top quryqtaldy

UQK Almaty qalasy boıynsha departamenti Eýroodaq elderinen Qazaqstanǵa poshta arqyly sıntetıkalyq esirtki jetkizetin kontrabandalyq arnany uıymdastyrǵan toptyń jolyn kesti. Bul jóninde Ulttyq qaýipsizdik komıtetiniń baspasóz qyzmetine silteme jasap, Qamshy.kz aqparat agenttigi habarlaıdy.

6 qarashada poshta bólimshesinde jedel-izdestirý sharalaryn júrgizý nátıjesinde 968 psıhotroptyq tabletka tabyldy.

Sondaı-aq, Germanııa arqyly Nıderlandydan kontrabandalyq esirtki jetkizýge qatysy bar Almaty qalasynyń eki turǵyny – "K" men  "D" ustaldy.

"Ustalǵan "K"-nyń turǵylyqty jeri boıynsha shamamen 1.5 kg "gashısh" esirtkisi men 30 g mefedron alyndy. Alynǵan zattar sot-hımııalyq saraptamaǵa joldandy. Esirtki quraldary men psıhotroptyq zattardy ınternet-dúken arqyly ótkizip otyrǵan" – delingen habarlamada.

Atalmysh derekter boıynsha QR UQK Almaty qalasy boıynsha departamenti QK 297-baby 3-bólimi boıynsha qylmystyq is qozǵady. Ustalǵan adamdar Almaty qalalyq polısııa departamentiniń ýaqytsha ustaý ızolıatoryna qamaldy. Qazirgi tańda sotqa deıingi tergeý jumystary jalǵasýda.