«Er Qarmys» fılmi jaryq kórdi

Aqtaýda joryq jyrshysy Qalnııaz jyraý Shopyqulynyń «Er Qarmys» dastanynyń negizinde túsirilgen kıno-jyrdyń tusaýkeseri ótti. Týyndynyń rejısseri - Nartaı Saýdanbekuly. Bas keıipker - jetpis bes jastaǵy Er Qarmystyń rólin QR eńbek sińirgen qaıratkeri Qonysbek Begaıdarov sheber oınap shyqqan.

Kútpegen jerden shapqan jaý, azamattardyń qapyda qyrshynnan qıylýy, mal-jannyń talan-tarajǵa túsýi. Bul habardy estigen boıda Er Qarmys batyr jaýǵa toıtarys berýge bet alady. Er Tólepke habarlap, ol kelgenshe jaýdy qýyp jetip jalǵyz ózi qarsy turady. Kıno-jyrdyń jelisi osylaı órbıdi. Elin qorǵaǵan batyr beınesi qaısarlyq, qaharmandyq, márttikpen jetkizilgen.

-Qalaı men oıladym solaı shyqqan. О́te rızamyn. Halyqtyń qabyldaýy erekshe. О́zimniń oıymnan shyqty. Jyr bizdiń ulttyq jadymyz. Ǵasyrdan-ǵasyrǵa ult bolyp qalý úshin osy jyrdy ózegimizdi myqty ustaýymyz kerek, deıdi ssenarıst-dramatýrg Jánibek Áliken.

Kıno-jyrdyń tusaýkeseri Ábish Kekilbaıulynyń 80 jyldyq mereıtoıy aıasynda ótýi beker emes. Sebebi, abyzdyń ózi «Dýadaq qonǵan boz tóbe» atty tarıhı tanymdyq eńbeginde «Er Qarmysty», «Balýanııaz batyr», «Toǵyz aýyl» dastandarymen baılanystyryp jazyp ketken. Jańa fılmniń ereksheligi - atalmysh dastannyń jelisi buzylmaı, oqıǵalar jyrdyń negizinde órbip otyrady.

-Ábish aǵamyz endi Mańǵystaýdyń búkil uńǵyl-shuńǵylyn, batyr-baǵylandaryn, jalyp salt-dástúrlerin óziniń shyǵarmalarynda aıtyp maqtan tutyp ótken. Ábish aǵanyń shyǵarmalary ishinde de osy Er qarmys jaıly bar. Ábish aǵanyń 80 jyldyq mereıtoıynda biz osy fılmdi kózaıym qylyp alyp kelip jatyrmyz. Halyqtyń qabyldaýy erekshe sııaqty. Buryn-sońdy mundaı bolmaǵan. Jyraý aıtyp otyrǵanda ekranda oqıǵanyń órbip otyratyny bolmaǵan. Bul qazaqqa tán, qazaqtyń sanasyna tán nárse dep oılaımyn, deıdi QR halyq ártisi, «Qurmet» ordeniniń ıegeri Tuńǵyshbaı Jamanqulov.

Erekshe tolqyǵan kórermenniń kóbi kózine eriksiz jas úıirdi. Beıneklıp nemese qysqametrajdy fılm deýge mazmuny men aýqymy syımaıtyn týyndyny kórgender bir aýyzdan kıno-dastan dep baǵalady.

- Qazaq batyrlarynyń eldi, adamdaryn, baılyqtaryn qalaı qorǵanyn osy fılmnen-aq nátıje shyǵarýǵa bolady. Sebebi, 75 jas degen ońaı jas emes. Bul úlken jas. Onyń ber jaǵynda turǵan kúshi keýdesine syımaı turǵan jastardyń ózi ondaıǵa barmaıdy. Sol kezdegi úlken adamdar elin, halqyn qalaı qorǵaǵan, qalaı syılaǵan, jastardy da ózine qaratyp tárbıelegen, deıdi «Balyqshy ata» qoǵamdyq qorynyń tóraǵasy, «Tulparqurylys» JShS bas dırektory Qylyshbaı Kósherbaıuly.

Kóptiń kóńilinen shyqqan kıno-jyr aldaǵy ýaqyta qalyń kórermenge jol tartady.