Nazarbaev: Tek kúsh biriktirý arqyly ǵana jańa qaýipterge qarsy tura alamyz

Bir eldiń nemese aımaqtyń ǵana emes, tutas adamzattyń keleshegi búgingi emtıhandy qalaı ótkenimizge baılanysty bolmaq. Búgin, 12 qarashada Nur-Sultanda ótip jatqan "Astana Club" otyrysynda Qazaqstannyń eks-prezıdenti Nursultan Nazarbaev osylaı dedi.

- Búkil Eýrazııada qaýipsizdik pen turaqtylyqsyz eshkim de uzaq merzimdi damýǵa qol jetkize almaıtynyn Qazaqstan uǵyp otyr. Sol sebepti búgingi jaǵdaıda qurlyqtaǵy barlyq elder tar aımaqshylyqqa, bloktyq oılamǵa berilmeı, eýrazııalyq aýqymdy sanatta oılanýy tıis. Tek osylaı ǵana Eýrazııalyq sýbqurlyq ózine tán áleýetti iske asyra alady. Dál osy rette bizdiń klýb Úlken Eýrazııa atty jańa geosaıaı qurylymda biryńǵaı alań bolyp otyrǵany qýantady, - dedi Nazarbaev.

Nazarbaev áıgili oıshyl Arnold Toınbıdiń sózin keltirdi.

- Tarıhtyń syn-tegeýrinine qarsy tapqan jaýaptaryna qaraı árbir qoǵam damyp, jeńip keledi. Tarıh – qatal ekzamenator. Kóp el burys nemese orynsyz áreketi úshin jaýap bergen. Bir eldiń nemese aımaqtyń ǵana emes, tutas adamzattyń keleshegi búgingi synaqty qalaı ótkenimizge baılanysty bolmaq. Tek kúsh biriktirý arqyly ǵana jańa qaýipter men tegeýrinderge qarsy tura alamyz, - dedi Nursultan Nazarbaev.

Búgin, 12 qarashada Nursultan Nazarbaevtyń qatysýymen elordada "Astana Club" otyrysy ótip jatyr. Bul jıynǵa álemniń 23 memleketinen geosaıasat, ekonomıka men halyqaralyq qatynastar salasynyń sarapshysy retinde moıyndalǵan 50-den astam halyqaralyq spıker qatysýda. Qurmetti meımandardyń qatarynda - 3 burynǵy memleket basshysy, 5 eks-premer-mınıstr, 10 mınıstr jáne Nobel syılyǵynyń laýreaty bar.