Júz jyldyqtyń jylnamasy bolǵan basylym

Elimizdiń bas gazetiniń ujymyn quttyqtaǵan Baqytjan Saǵyntaev «Egemen Qazaqstannyń» tarıhy «Ushqyn» gazetiniń birinshi nómirinen bastaý alatynyn atap ótti.

«Búgin gazettiń 29 696 nómiri jaryq kórdi. Árbir nómirde Táýelsiz Qazaqstan Respýblıkasynyń qalyptasýynyń qıyn joly sıpattalady. Kezinde bul basylymdy Smaǵul Sádýaqasov, Júsipbek Aımaýytov, Beıimbet Maılın, Sáken Seıfýllın, Muhtar Áýezov, Turar Rysqulov, Oraz Jandosov, Ǵabıt Músirepov, Qasym Sháripov, Sapar Baıjanov, Balǵabek Qydyrbekuly, Sherhan Murtaza, Ábish Kekilbaev syndy tulǵalar basqaryp edi. Olar gazettiń ár nómirine qaıtalanbas qoltańbasyn qaldyra bildi. Bul tulǵalardy Otanǵa degen mahabbat pen oqyrmanǵa degen qurmet biriktirdi», – dep atap ótti shahar basshysy.

Qala ákimi «Egemen Qazaqstan» gazetiniń bas redaktorlarynyń biri bolǵan Nurlan Orazalın men gazettiń qazirgi basshysy Darhan Qydyrálini Almatynyń damýyna qosqan úlesi «Enbegi úshin» úshin degen tósbelgimen marapattady. Gazettiń birqatar ardagerleri men jýrnalısteri Almaty ákiminiń Qurmet gramotalarymen marapattaldy.

Bul kúni saltanatty túrde «Egemen Qazaqstan» gazetiniń memorıaldyq taqtasynyń ashylýy ótti.

Onda 1987 jyldan 1999 jylǵa deıin Gogol jáne Zenkov kósheleriniń qıylysynda gazettiń redaksııasy ornalasqan. Eskertkish taqtanyń ashylýyna Almaty qalasy ákiminiń orynbasary Erjan Babaqumarov qatysyp, basylymnyń ǵasyrlyq tarıhyndaǵy Almatynyń rólin atap ótti.

«1929 jyly gazet ujymy Qyzylordadan bizdiń qalaǵa kóshti. Sondyqtan Almatydaǵy memorıaldyq taqtanyń ashylýy-tarıhı zańdylyq pen bizdiń azamattyq paryzymyz», – dedi Erjan Babaqumarov.

Sondaı-aq, sharaǵa Qazaqstan Respýblıkasynyń eńbek sińirgen mádenıet qyzmetkeri, jýrnalıst-ardager Sarbas Aqtaev, qazaq baspasóziniń ardageri Jaqyp Mamadııar, jazýshylar, zııaly qaýym ókilderi men tanymal jýrnalıster qatysty. Buǵan deıin Almatyda «Egemen Qazaqstan» gazetiniń 100 jyldyǵyn merekeleý aıasynda birqatar saltanatty is-sharalar ótti. Sonyń ishinde jazýshy Ábish Kekilbaev atyndaǵy kósheniń ashylýy, sondaı-aq, jazýshy Sherhan Murtaza turǵan úıge memorıaldyq taqta ornatyldy.