Kókshetaý mektepteriniń birinde belgisiz dert jaılady

Kókshetaýda mektepti belgisiz dert jaılady dep habarlaıdy Qamshy.kz aqparat agenttigi ktk.kz saıtyna silteme jasap.

Kókshetaýda bir kúnde 80 bala aýyryp murttaı ushty. Qala ortalyǵyndaǵy №2 mektepte búgin 260 oqýshy sabaqqa kelmeı qaldy. Kesheden beri aıaǵynan tik turǵan dárigerler úı-úıdi aralap, mekteptegi balalardy da bastan-aıaq tekserýge kirisken. Olardyń barlyǵy júregi aınyp álsirepti.

Keshe bolǵan syrqat belgileri oqýshylarda búgin de baıqalǵan. Ustazdar ata-analaryn shaqyryp dárigerdiń qaraýyna jiberip jatyr. Bul – qala ortalyǵyndaǵy 2200-ge jýyq oqýshysy bar eń úlken mektep. Bir sátte 80 oqýshy aýyryp qalǵanda mektep basshylyǵy dabyl qaǵa bastaǵan. Sanıtar mamandar mektep ashanasynan qajetti synamalar alypty. 

Gúlnar Ábdiqasymova, mektep dırektory: - Búgin 260 oqýshy mektepke kelmeı qaldy. Kóbin ataanalary qaýiptenip jibermeı qalǵan. Solaı dep mektepke habarlasty. Bul jaǵdaıdyń neden bolǵanyn aıta almaımyz. Ashanada ýlanýy múmkin emes. Barlyq balalar tamaq iship júr ǵoı. Qajetti tekserý jumysyn uıymdastyryp jatyrmyz. 

Oqýshylarmen birge eki muǵalim de naýqastanyp qalǵan. Ishi aýyryp, qusyp, basy aınalyp mektepke kele almaǵandardy dárigerler qarap jatyr. Sabaq ústinde de balalardyń densaýlyǵyn tekserýde.

Mádına Saǵymbaeva, terapevt: - Keshe mektepte 300, búgin 150 balany qarap úlgerdik. Aýrý belgileri baıqalmady. Jaǵdaılary jaqsy. Syrqattanyp qalǵan balalar analız tapsyryp jatyr. Oqýshylardy túgel qarap shyǵamyz, ázirge naqty dıagnozyn aıta almaımyz.

Bilim oshaǵyn dúrliktirgen derttiń sebep saldaryn sanıtar mamandar anyqtap jatyr. Ashanadaǵy taǵamnan synamalar alyp, balalar analız tapsyrýǵa jiberilgen. Sondyqtan dál qazir dıagnozdy dóp basyp aıtý qıyn deıdi mamandar. Vırýstyq ınfeksııa ma, álde ýlaný ma, ol endi saraptama qorytyndysynan keıin belgili bolady.