Sıfrlyq saýattylyq deńgeıi qaı óńirde joǵary?

Almaty ákimi "Adaldyq Alany: sybaılas jemqorlyqqa qarsy qoǵam men memlekettiń ózara is-qımylynyń jańa formaty" respýblıkalyq forýmyna qatysty, dep jazady almaty.gov.kz.

Qazaqstan Respýblıkasy Sybaılas jemqorlyqqa qarsy is-qımyl agenttiginiń tóraǵasy Alık Shpekbaev jáne BUU Jahandyq kommýnıkasııalar departamentiniń ókili Vlastımıl Samek qatysqan sharada sybaılas jemqorlyq kórinisterin azaıtý boıynsha is-qımyldy jetildirý jáne memorgandar jumysynyń ashyqtyǵyn arttyrý máseleleri talqylandy.

Qala ákimi B. Saǵyntaev quttyqtaý sózinde sybaılas jemqorlyqtyń aldyn alýdyń pármendi sharasynyń biri memqyzmet kórsetýde adamdyq faktordy qysqartý ekenin atap ótti.

"Almaty sıfrlyq saýattylyqtyń deńgeıi boıynsha elimizde kóshbastaýda, ıaǵnı 82 prosentke jetti. Onyń ústine, Almaty BUU-nyń azamattarǵa arnalǵan onlaın-servısterdi damytý reıtıngine engen Orta Azııadaǵy jalǵyz qala jáne 25 oryndy ıelengen. Smart City konsepsııasyn damytý aıasynda qaýipsizdikti qamtamasyz etý, TÚKSh, kólik, bilim men densaýlyq saqtaý salalarynda jobalar oıdaǵydaı júzege asýda", – dedi Baqytjan Saǵyntaev.

Onyń málimeti boıynsha, aǵymdaǵy jyldyń ótken toǵyz aıy ishinde memqyzmettiń 95%-y elektrondy formatta kórsetilgen, barlyq memqyzmettiń 80%-y avtomattandyrylǵan. Open Almaty portaly arqyly qala turǵyndarymen turaqty keri baılanys qamtamasyz etilgen. Eki jyl ishinde 195 myńnan astam ótinish óńdelip, olardyń 71%-y jergilikti jerde sheshilgen. Túsken ótinishterge taldaý júrgiziledi, sonyń negizinde jedel sharalar qoldanylady. Aıta keterligi, qala ákimi bir aıda eki ret, sonymen qatar aýdan ákimderi men basqarma basshylary kún saıyn azamattardy jeke qabyldaıdy. Megapolıs basshysy problemaly ýchaskelerge ózi baryp, sol jerde jaǵdaımen tanysady jáne aýdan turǵyndarymen ashyq formatta kezdesedi. Osylaısha, "tyńdaıtyn memleket" konsepsııasy júzege asýda.

Forýmnyń jumysyna aýdan ákimderi, memlekettik jáne jeke mekemelerdiń basshylary, qoǵamdyq uıymdar men saıası partııalardyń, kásipodaqtardyń, etnobirlestikterdiń, halyqaralyq uıymdardyń ókilderi, sybaılas jemqorlyqqa qarsy "Adaldyq Alany" jobalyq ofısterdiń óńirlik basshylary qatysty.