Sarysýlyqtar et eksporttaýda kósh bastady

Negizinen óndiristik, ındýstrıaldy aımaqqa jatatyn Sarysý aýdanynda sońǵy jyldary agro salanyń qarqyndy damýy baıqalady. Aýdandaǵy agrosektordaǵ negizgi kórsetkishter egin sharýashylyǵyna tıesili bolǵanymen aımaqtaǵy mal sharýashylyǵynyń tabystylyǵy eselep artqan. Jyl basynan beri dál osy baǵytta jumys jasaıtyn sharýashylyqtardyń esebinen jalpy somasy 4 mıllıard 500 mıllıon teńge bolatyn aýyl sharýashylyq ónimi óndirildi, dep jazady Qamshy.kz aqparat agenttigi. 

Mal sharýashylyǵynyń tabystylyǵynyń mysaly retinde aımaqtaǵy mal basynyń sany da jyl sanap ulǵaıa túskenin atap ótýge bolady. Máselen jyl basynan beri aımaqtaǵy múıizdi iri qaranyń jalpy sany 20 784 basty qurady. О́z kezeginde iri qara mal basynyń sany ótken jyldyń esepti kezeńimen salystyrǵanda 1053 danaǵa kóbeıgen. Sol sekildi ósim Qambar ata túliginiń úıirinde de baıqalady. Máselen Sarysýdaǵy qazirgi jylqynyń jalpy sany 6567 dana bolsa, ósimdilik 334 basty quraǵan. Aýdanda qazir 239 509 bas qoı-eshki jáne 2 122 bas túıe bar eken.

Tórt túligi Qarataýdyń tóskeıin jaıylaǵan aýdanda mal sharýashylyǵy ónimderin óndirý isinde de tolaıym tabysqa qol jetkizilgen.Qańtar aıynan beri aımaqtaǵy mal sharýashylyǵy baǵytynda jumys jasaıtyn agroqurylymdar 5 312 tonna et jáne 4 484 tonna sút óndirdi. Bıyl sarysýlyq sharýalar et ónimderin 171,4 tonnaǵa, sútti 100,6 tonnaǵa artyq óndirdi. Sondaı-aq bıyl aýdandaǵy qus sharýashylyǵy baǵytynda jumys jasaıtyn sharýashylyqtarmen 3 mıllıon 129 myń dana jumyrtqa daıyndalǵan.

Jalpy mal sharýashylyǵy salasyndaǵy joǵary eńbek ónimdiligin esepteýde aýdan sharýalarynyń eksporttyq áleýeti de eskeriledi. Bul faktor boıynsha sarysýlyq sharýalardyń aýyz toltyryp aıtýǵa bolatyn jetistikteri de bar. Aǵymdaǵy jyly jergilikti fermerlerge 50 tonna sıyr etin eksporttaý mejesi qoıyldy. 9 aıdyń qorytyndysynyń ózinde sharýalar bul mejeni 100 paıyz oryndaı aldy. Al qoı eti eksporty boıynsha bekitilgen jospar 160 tonnaǵa teń. Jyl basynan beri sarysýlyqtar Shopan ata túligi etiniń 43 tonnasyn eksportqa jóneltken. Saladaǵy kórsetkishterge qarap otyryp fermerlerdiń jyl sońyna deıin bul mejeniń údesinen shyǵýdyń barlyq múmkindikteri qarastyrylyp jatqany ańǵarylady.

Jalpy aýdandaǵy mal basy sanynyń ulǵaıýy jáne onyń ónimdilgin arttyrýyna memleket tarapynan kórsetiletin qoldaýdyń kómegi kóldeı. Tek «Qulan», «Altyn asyq» baǵdarlamalarynyń ózi sharýalardyń ekinshi tynysyn ashatyn bastamalarǵa múmkindik berdi.