Depýtat vıse-mınıstrdi otstavkaǵa jiberýdi talap etti

Senat depýtaty Edil Mamytbekov plagıat tóńiregindegi daýdan keıin bilim jáne ǵylym vıse-mınıstri Fatıma Jaqypovany qyzmetinen bosatý máselesin qozǵady, – dep Qamshy.kz aqparat agenttigi habarlaıdy.

"Sizder bilesizder, bir aıdan astam ýaqyt boıy otandyq BAQ pen sheteldik uıymdar qazaqstandyq vıse-mınıstrdiń plagıatyn talqylap jatyr. Qazir álemde moıyndalǵan eki antıplagıattyq júıe basqa bireýdiń ǵylymı jumysyn paıdalaný faktisin rastap otyr. Mundaı jaǵdaıda vedomstvolyq ulttyq memlekettik ǵylymı-tehnıkalyq saraptama ortalyǵyn paıdalanyp, qazaqstandyq qoǵamdy jańylystyrý –  memlekettik qyzmetkerdiń etıkalyq kodeksin buzý bolyp sanalady", – dep depýtat jaýap qatty.

Sondaı-aq "Basqasha aıtqanda, bizde ǵylymdy basqaratyn ókiletti organda obektıvtilik pen ádildik joq", – dedi Mamytbekov

Odan ózge senat depýtaty "jalǵan ǵalym" dep aıyptalǵan vıse-mınıstrdiń áli de óz qyzmetinde júrgenin aıtty.

Mamytbekov: "Nege áli kúnge deıin kadrlyq sheshim qabyldanǵan joq?"– deı kele, ǵylymı qoǵam men joǵary bilim júıesin ózge elder aldynda Qazaqstannyń bedelin túsirgen laýazymdy tulǵanyń masqarasynan qutqarýdy talap etti.