Tanymal jýrnalıstiń dárisine qulaq túrdi

Jambyldyq jýrnalıstermen salaǵa endi aıaq basqan jas mamandar «Qazaqstan» ulttyq teleradıo korporasııasynyń bas redaktory, tanymal jýrnalıst, Qazaqstannyń eńbek sińirgen qaıratkeri Qaınar Oljaı kezdesti, dep jazady Qamshy.kz aqparat agenttigi. 

Áserli kezdesý eń áýeli M. H. Dýlatı atyndaǵy TarMÝ-diń májilis zalynda «jýrnalıstıka» mamandyǵy stýdentteri ótti. Bul basqosýda saqa jýrnalıst qalamgerlikke tańdaý jasaǵan jastarǵa aqyl-keńesin aıtyp, olardyń kókeılerinde júrgen saýaldaryna jaýap qaıtty. Sondaı dál osy kúni tús aýa Qaınar Qalıaqparuly Shoqan Ýálıhanov atyndaǵy oblystyq ámbebap-ǵylymı kitaphanasynda jergilikti BAQ ókilderimen júzdesti. Jıyndy ashyp berip, júrgizip otyrǵan jýrnalıst, oblystyq máslıhattyń depýtaty Meırambek Tólepbergen qadirli qonaqtyń júrip ótken ómir joly, jetistigi, ataq - abyroıy, ómirlik ustanymdaryna toqtalyp, jıylǵandardy ashyq áńgime órbitýge shaqyrdy.

Qaınar Oljaı óz sózinde búgingi jýrnalıstıka álemi men kórkemsóz keńistigindegi jańashyldyqtardy, dástúrli jýrnalıstıka men blogerler básekesi qyzyp turǵanyn aıtty. Ol bul jaǵdaıda jýrnalıster ózderiniń myqtylyǵyn jáne qajettiligin, bilimdiligi, jan - jaqtylyǵy, jańashyldyǵy, kez kelgen jerden aqparat ala alatyn sheberligi, barlyq taqyrypty jerine jetkizip, tereń jaza alatyn talanty bolýy arqyly dáleldeı alatynyn, izdenisimen ǵana blogerlerdi shań qaptyratynyn jetkizdi. «Saıttardaǵy maqalalardyń jazylý deńgeıi belgili basylymdarmen salystyrǵanda mektepterdegi qabyrǵa gezetimen teń» - dep baǵa berdi ol.

Munan soń oblystyq «Aq joI» gazetiniń bas redaktory Kósemáli Sáttibaıuly, «Arai» jastar gazetiniń bas redaktory Dáýlet Tólendi, respýblıkalyq «Aıqyn» gazetiniń oblystaǵy menshikti tilshisi Erman Ábdıev, «Taraz 24. kz» aqparat alańynyń dırektory Zarına Qýatova, aqyn Baımahanbet Ahmet, «77» telearnasynyń redaktory Aqsáýle Ábdiraı kelgen qonaqqa túrli suraqtar qoıdy. Oppozısııalyq baǵyttaǵy jýrnalıstıka bar - joq ekendigi týraly, termınderdiń zańdylyqtary, aýdarma máseleleri, ánshi men akterlerdiń tóńirgindegi suraqqa Q.Oljaı sapaly, naqty jaýap berdi.

Jıyn sońynda Kósemáli Sáttibaıuly oblystaǵy jýrnalısterdiń Qaınar Oljaımen kezdesýi jas jýrnalısterdiń jumysyna jańa serpin beretinine toqtalyp, osyndaı kezdesýler sala mamandary arasynda dástúrge aınalsa degen usynysyn jetkizdi.