Meduıymdardyń MÁMS-ke tehnıkalyq daıyndyǵy pysyqtaldy

Qalalyq ákimdikte shahar basshysynyń orynbasary E.Babaqumarovtyń tóraǵalyǵymen megapolıstiń memlekettik emes medısınalyq uıymdary basshylarynyń qatysýymen jıyn ótti. Munda mindetti áleýmettik medısınalyq saqtandyrýdy engizýge daıyndyq barysy qaraldy, dep jazady ákimdiktiń resmı saıty.

Erjan Babaqumarov MÁMS-tiń enýine tolyq tehnıkalyq daıyndyqtyń mańyzdylyǵyn atap ótti. Búginde búkil el boıynsha mindetti áleýmettik medısınalyq saqtandyrý júıesine kóshý jumystary kezeń-kezeńimen jalǵasýda.

– Qazirgi tańda TMKKK sheńberinde kómek kórsetetin barlyq 92 jeke menshik medısınalyq uıymdarda medısınalyq aqparattyq júıeler ornatyldy. Alaıda, Densaýlyq saqtaý jáne áleýmettik saqtandyrý júıelerimen ıntegrasııalaý prosesi tolyq aıaqtalǵan joq, – dep atap ótti qala ákiminiń orynbasary.

2018 jyly naýryzda Qazaqstan Respýblıkasy Densaýlyq saqtaý mınıstriniń №127 Buıryǵymen medısınalyq aqparattyq júıelerge (MAJ) qoıylatyn eń tómengi talaptar anyqtaldy. Basty talaptardyń biri – Densaýlyq saqtaý mınıstrliginiń aqparattyq júıesiniń ınteroperabeldi bolýy.

– Ázirleýshilerdiń kóbi óz mindettemelerin oryndamady. Osynyń saldarynan solardyń júıelerin ornatqan medısınalyq uıymdar búgingi kúni MÁMS formatynda jumysqa daıyn emes, – dedi Erjan Babaqumarov.

Bul rette ol 2019 jyldyń 1 jeltoqsanyna deıin MÁMS engizýge barlyq medısınalyq uıymdardyń tolyq tehnıkalyq daıyndyǵyn qamtamasyz etýdi tapsyrdy. Sonymen qatar, qala ákiminiń orynbasary jeke medısınalyq uıymdardyń medısınalyq qyzmet kórsetý standarttaryn akkredıtasııalaý jumysyn jedeldetýdi tapsyrdy. Keńeste sıfrlandyrý basqarmasynyń basshysy Baıan Qońyrbaev pen QR DSM «Respýblıkalyq elektrondyq densaýlyq saqtaý ortalyǵy» ShJQ RMK Almaty fılıaly dırektorynyń orynbasary Kamıla Faızýllına sóz sóıledi.