Ombyda sýretshi Amangeldi Shákenovke eskertkish qoıyldy (foto)

Eskertkishtiń ashylýynda Reseıdegi Qazaqstan elshisi Imanǵalı Tasmaǵambetov Amangeldi Shákenovtyń Qazaqstan Sýretshiler odaǵynyń akademıgi bolǵanyn jáne eki el arasyndaǵy rýhanı baılanysty damytýǵa ólsheýsiz úles qosqanyn atap ótti.

"Amangeldi Ábdirahmanulynyń sýretshi retinde Reseıde qalyptasqany sózsiz, biraq úlken ataq-dańqty Qazaqstannan tapty. Onyń týyndylary ár ýaqytta da reseılikter men qazaqstandyqtardyń júreginen oıyp oryn alaryna, sýretshiniń baýyrlas qos halyqtyń jadynda máńgige qalaryna senimdimin", – dedi elshi.

Eskertkishti Sankt-Peterbýrgten kelgen músinshi Meıram Baımuhanov qola men granıtten jasaǵan. Oryndyqta oıǵa shomyp otyrǵan Amangeldi Shákenovtiń músini men onyń artyna molbert tur. Tuǵyrǵa "Amangeldi Shákenovke – sýretshi jáne ustazǵa" dep jazylǵan.

"Eki memlekettiń mádenıetinde jarqyn iz qaldyrǵan adamnyń eskertkishi Reseı men Qazaqstan arasyndaǵy aımaqaralyq yntymaqtastyq forýmynda ashylýy tegin emes. Bizdiń elderimizdi tek geografııalyq oryn men tyǵyz ekonomıkalyq baılanys qana emes, osy eskertkishte beınelengen ortaq mádenı dástúrler de biriktiredi", – dedi Omby oblysy úkimeti tóraǵasynyń birinshi orynbasary Valerıı Boıko óziniń quttyqtaý sózinde.

Reseıdiń eńbek sińirgen mádenı qaıratkeri jáne Qazaqstan óner akademııasynyń akademıgi Amangeldi Shákenov 2018 jyldyń 1 mamyrynda 74 jasynda qaıtys boldy. Shyǵarmashylyq ómirinde sýretshi kóptegen týyndylar saldy. Onyń eńbekteri Almatydaǵy Á.Qasteev mýzeıinde, Prezıdenttik mádenıet ortalyǵynda, Nur-Sultan qalasyndaǵy QR О́ner akademııasy qorynda jáne jeke toptamalarda saqtaýly.