Aýyldardyń ajary ashylyp keledi

Qarqyndy damý jolyna túsken elimizdiń ár aımaǵynda áleýmettik máseleler oń sheshimin tabýda. Ásirese, sońǵy jyldary aýyldy jerlerde atqarylǵan jumystar kóńil qýantady. Ásirese, túrli memlekettik baǵdarlamalar arqyly ajary ashylǵan aýyldar az emes. Sondaı eldi mekenniń biri – Jambyl oblysy, Qordaı aýdany, Otar aýyly dep jazady Qamshy.kz aqparat agenttigi. Otar aýylynyń irgesinen oryn tepken, el aýzynda «Voensovhoz» atanatyn eldi meken jeri Almaty oblysynan Jambyl oblysyna ótkeli kóp ýaqyt ótpegenimen, osy meken turǵyndarynyń kókeıinde júrgen kóptegen máseleler birtindep sheshimin taýyp keledi. Soǵan dálel retinde bıyl mundaǵy Abaı kóshesine asfalt tóselip, jurtshylyqtyń bir tilegi oryndaldy. Jóndeý jumystaryna «О́ńirlerdi damytý» baǵdarlamasy aıasynda qomaqty qarjy bólinip, qurylys jumystaryn merdiger «Aq Jol Servıs 2030» jaýapkershiligi shekteýli seriktestigi ýaqytyly oryndap shyqqan. Sonymen qatar, №43 orta mektepten B.Momyshuly kóshesine deıingi aralyqqa da asfalt tóselip, oqýshylardyń mektepke qatynaýy jeńildeı túsken. Bul jumysty jergilikti bıýdjetten bólingen qarajatqa «Nur Servıs-2050» jaýapkershiligi shekteýli seriktestigi atqaryp shyǵypty.

Otar aýylynyń Gagarın kóshesi túngi mezgilde endigári samaldaı jarqyrap turatyn bolady. Kóshe boıyna jaryqtandyrý jumystary júrgizilip, tipti arnaıy transformator da qoıylǵan. Sol mańda ornalasqan keıbir úılerge jaryq symdary da tartylyp berilipti. Bul másele, aýdan basshysy Bolatbek Baıtóleniń halyq aldyndaǵy esepti kezdesýi kezinde kóterilgenin aıta ketken jón. Turǵyndardyń bul tilegi sol sátte basshylyqtyń nazaryna alynyp, búgingi tańda tolyqtaı sheshimin taýyp otyr. Atalmysh jumystardy júrgizgen «Qordaı-Elektroservıs» jaýapkershiligi shekteýli seriktestigi ol kóshege elektr qýatyn únemdeıtin zamanaýı shamdar ornatypty.

Aýdandaǵy iri eldi meken sanalatyn Otar aýyldyq okrýgi elimiz boıynsha úlken áskerı bazamen irgeles jatqany belgili. Osyǵan oraı munda kólik qarqyny da óte joǵary. Sol sebepti turǵyndardyń qaýipsizdigin qamtamasyz etý úshin jalpy okrýg aýmaǵyndaǵy jol belgileri jańartylyp, qaýipsizdik sharalaryna asa kóńil bólingen. Belgilerdi ornatý jumystaryn merdiger «Kaz Express Stroy» JShS óz moınyna alyp, bólingen qarjyny tıimdi ıgergen.

Aýdanda sońǵy jyldary aýyz sý máselesin sheshý jumystaryna asa den qoıylýda. Byltyr ǵana Aýqatty aýylynyń sý qubyr júıesi jańartylyp, jańa sý kerneýish munara ornatylsa, bıyl Áljan ana aýylynyń aýyz sý máselesi túbegeıli sheshimin tappaq. Aýdan ákimi Otar aýyldyq okrýgine barǵan jumys sapary barysynda jergilikti turǵyndar aýyz sý máselesin kótergen edi. Bolatbek Baıtóle sol kezde «Qordaı sý» KMK mamandaryna atalmysh máseleni qolǵa alýdy tapsyryp, óz baqylaýyna alǵan bolatyn. Kóp kúttirmeı keńes zamanynda salynǵan kólemi 25 tekshe metrlik eskirgen sý munarasynyń janynan 50 tekshe metrlik jańa munara ornatyldy. 23 metr bıiktiktegi rezervýar joǵary qysymmen tutynýshyǵa sýdy erkin jetkizedi. «Qordaı sý» mekemesiniń mamandarynyń aıtýynsha, turǵyndar sýdy tıimdi paıdalanyp, tek turmystyq qajettilikke jaratsa, eldi meken táýlik boıy sýmen qamtylatyn bolady. Endigi kezekte otarlyqtar eseptegish quralyn ornatyp, jaqyn arada munara iske qosylmaq.