Ulttyq taǵamdar usynyldy

Taraz qalasyndaǵy «Dostyq» úıinde «Qoǵamdyq kelisim» mekemesiniń uıytqy bolýymen túrli ult ókilderiniń «gastronomılyq dámder» festıvali ótti. Elbasynyń «Bolashaqqa baǵdar: rýhanı jańǵyrý» baǵdarlamasy aıasynda ótken sharaǵa oblystaǵy barlyq etnos ókilderi qatysyp, ózderiniń ulttyq taǵamdarynyń shyǵý tarıhymen tanystyryp, jasalý joldaryn kórsetti. Festıvaldi oblystyq Qazaqstan halqy assambleıasy hatshylyǵynyń meńgerýshisi Marjan Qojaeva ashyp, qatysýshylarǵa sáttilik tiledi. –Mundaı festıval buǵan deıin respýblıka kóleminde ótkizilip kelgen bolatyn. Bıyl alǵash ret ózimizdiń óńirde uıymdastyrýdy jón sanadyq. Uıymdastyrýdaǵy basty maqsatymyz elimizde turatyn túrli ult ókilderiniń dostyǵyn nyǵaıtý, ulttyq taǵam men salt-dástúrdiń mádenıetin joǵary deńgeıge kóterý jáne nasıhattaý. Sondyqtan sharaǵa belsendi atsalysýǵa shaqyramyn. Tek qonaq bolyp ketpeı túrli ulttardyń aspazdyq ereksheligin saralap, baǵa berińizder. Bul festıval, ásirese, jastardyń ózderine asa qyzyqty bolyp, ózge ult ókilderiniń mádenıetine syı-qurmetin arttyra túsedi,- dedi Marjan Tórequlqyzy.

Sharada jınalǵan qaýymǵa oblystaǵy úzdik meıramhanalar men kondıterlik ortalyqtardyń barmaǵynan bal tamǵan aspazdary ónerlerin kórsetti. Festıvaldiń alǵashqy bóliminde Abaı ómir súrgen kezeńdegi taǵamdar boıynsha sheberlik synyby kórsetildi. Bul bólimde alǵashqy bolyp kópbalaly ana, aspaz Symbat Sıqymbaeva «Búrmeqaryn», «Jaýjúrek» taǵamyn daıyndap, qazylar alqasyna usyndy. Qunarly da, dárýmenge baı «Jaýjúrek» asynyń jasalýyna erekshe toqtaldy. Onyń aıtýynsha bul taǵamdy ertede analarymyz ásirese ul balalarǵa jaýjúrek, batyl bolsyn dep jıi daıyndap beredi eken. Kelesi aspaz Maısa Aldabaeva taý halyqtarynyń «Hachapýrı», «Hıchıny» taǵamdaryn jasap kórsetip, daıyndaýda yjdahattylyq pen pysyqtyqty talap etetin bul dámdi jasaýdaǵy qupııalarymen bólisti. Lola Ábdiqaharova jeńil jasalatyn sýshı, kókónisterden jasalatyn tiskebasarlar jasaýdyń qyr-syrymen bólisti. Aleksandr Bogdanov túrli sýsyndar men kokteılderdi daıyndap kórsetti. Ásirese Aleksandardyń almamen árlep jasaǵan «shalap» sýsyny qazylar alqasynyń kóńilinen shyqty. Sharanyń kelesi bóliminde ulttyq naqyshtaǵy, ulttyq taǵamy men ydys-aıaǵy qoıylǵan birneshe etnomádenı birlestiktiń dastarhandary jaıyldy. Onda sol ulttardyń dástúrli mádenıeti, salt-dástúrleri tanystyryldy.