Nazarbaev: Túrkistandy astana retinde qarastyrǵanmyn

Qazaqstannyń Tuńǵysh Prezıdenti Túrkistan oblysynyń turǵyndarymen kezdesti dep habarlaıdy Qamshy.kz aqparat agenttigi Elbasy baspasóz qyzmetine silteme jasap. 

Sapar barysynda Elbasy qalanyń rýhanı-mádenı ortalyǵynda ótken konsertke qatysyp, Túrkistan oblysynyń turǵyndarymen júzdesti.

Sóz barysynda Nursultan Nazarbaev oblys ortalyǵyn Túrkistan qalasyna kóshirý týraly sheshiminiń tarıhı mańyzyna toqtaldy. "Táýelsizdik alǵannan soń Túrkistandy astana retinde qarastyrdym. Biraq, ózderińiz biletindeı, jaǵdaı buǵan jol bermedi. Búgin bul qala oblys ortalyǵyna aınaldy, shahardy jandandyrý jumystary júrgizilýde. Túrkistan - túrki áleminiń besigi. Baýyrlas túrki memleketteri de bizge kómektesedi dep senemin", - dedi Elbasy.

Qazaqstannyń Tuńǵysh Prezıdenti búkil qala boıynsha júrip jatqan qurylys qarqynynyń joǵary ekenin atap ótti. "Birinshi kezeńde 175 nysannyń qurylysy josparlanǵan. Onyń 102-ci bıyl iske qosylady. Bul proseske elimizdiń barlyq óńirleri qatysyp jatyr", - dedi Nursultan Nazarbaev.

Elbasy oblys ortalyǵynyń qurylysy men jandanýyna at salysyp jatqan barsha jurtqa alǵysyn bildirdi.

"Barlyq josparlanǵan nysandardyń qurylysy aıaqtalǵannan keıin biz týrısterdiń kóbeıýin kútemiz. Sonymen qatar, qosymsha jumys oryndary ashylady. Munyń bári bizdiń halqymyzdyń ómir súrý deńgeıine oń áser etedi", - dep túıindedi Qazaqstannyń Tuńǵysh Prezıdenti.

Konsert sońynda Nursultan Nazarbaev qolónershilerdiń kórmesin aralap kórdi. Onda álemniń 20 elinen kelgen sheberlerdiń jumystary usynylǵan.