100 ret qajylyqqa baryp, dúrkiretip toı jasaý durys pa? QMDB ókili jaýap berdi

Áleýmettik jelide Amangeldi Erenǵaıypulynyń 100 ret qajylyqqa baryp, toı jasaǵan vıdeosy tarap, qyzý talqyǵa tústi. "Nur-Qazaqstan" qajylyq kompanııasynyń prezıdenti 22 ret úlken qajylyqqa jáne 78 ret ýmra qajylyǵyna barǵan. 

Internette taraǵan vıdeoda toıdy júrgizgen asaba Amangeldi Erenǵaıypulynyń jetistikteri týraly aıtqan. 

"1992-1994 jyldary Merki qalasyndaǵy medresede dinı saýatyn ashqan, 1994 jyly Egıpet astanasy Kaır qalasynyń áıgili Ál-Azhar ýnıversıtetine oqýǵa qabyldanyp, 1999 jyly bitirgen. 2002 jyldan bastap "Spýtnık Qazaqstan" týrıstik kompanııasynda qajylyq bóliminiń meńgerýshisi bolyp qyzmet atqarǵan", - dep toı ıesin ortaǵa shaqyrdy asaba.

Beıresmı derekterge súıensek, atalmysh toıǵa Saýdııa men Egıpetten arnaıy qonaqtar kelip qatysqan. Sondaı-aq vıdeodan tanymal ánshi Sáken Maıǵazıevti de kórýge bolady. 

Buǵan qatysty Qamshy.kz aqparat agenttiginiń tilshisi QMDB ókiline habarlasyp pikirin bildi.

QMDB ókili Hasan Amanqulovtyń aıtýynsha, jaǵdaıy bar adamǵa ómirinde bir ret qajylyq jasaý paryz bolady eken. 

"Jalpy musylman adam jaǵdaıy bolsa ómirinde bir ret qajylyq jasaý paryz bolady. Al jaǵdaıy joq adamǵa Qajylyq jasaý paryz bolmaıdy, Alla Taǵalanyń aldynda kúnáhar bolyp eseptelmeıdi. Al ekinshi, úshinshi ret jasalǵan qajylyq nápil bolyp esepteledi. Iаǵnı barsa saýabyn alady, barmasa kúná bolyp eseptelmeıdi. Degenmen qosymsha oraza ustaýdy, namaz oqýdy, ýmra jáne úlken qajylyqqa barýdy, ıaǵnı paryz emes, nápil amaldardy barynsha jasyryn jasaǵan durys",- deıdi Sharıǵat jáne pátýa bólimi meńgerýshisiniń orynbasary. 

Sondaı-aq QMDB ókili qajylyq jasaǵannan keıin dúrkiretip toı jasaýǵa qatysty da óz pikirin bildirdi. 

"Rııa (kózboıaýshylyq – Red.) degen sekildi jaman qasıetter bar. Adamdar kórsin, estisin, tańǵalsyn degen nıet bolsa, jasaǵan amalynan eshqandaı saýap bolmaıdy. Biraq mundaı nıet bolmasa da, rııa jasaǵan sekildi kórinetin nárseden de barynsha saqtanǵan abzal", - deıdi Hasan Amanqulov.

Osydan 5 jyl burynǵy kazislam.kz saıtyna bergen suhbatynda Amangeldi Erenǵaıypuly alǵashqy 2 qajylyǵy ózi úshin, al qalǵany Mekke men Medınaǵa barýshylarǵa jetekshilik etý úshin ekenin aıtqan. Qamshy.kz aqparat agenttigi Amangeldi Erenǵaıypulyna da habarlasyp, ne sebepti ulan-asyr toı jasaǵanyn bilmek boldy. Alaıda ol qońyraýǵa jaýap bermedi.