Jańa zań engizildi: járdemaqy kimderge berilmeıdi?

Ataýly áleýmettik kómek berý kezinde alaıaqtyqqa jol bermeý maqsatynda zań jobasy ázirlendi dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

Eńbek jáne halyqty áleýmettik qorǵaý mınıstri Birjan Nurymbetovtyń aıtýynsha, bıyl ataýly áleýmettik kómekti tóleý júıesi ózgerip, ony alatyn azamattardyń sany artqannan keıin járdemaqyny taǵaıyndaý jaǵynan birqatar kemshilik jiberilgen. Osyny paıdalanǵan kóptegen adam óz tabysyn jasyryp, áleýmettik kómekti alyp kelgen.

"Qazirgi kezde azamat ataýly áleýmettik kómekke ótinish qana beredi. Qalǵan anyqtamanyń barlyǵy aqparattyq júıe arqyly retteledi. Iá, buǵan deıin óz tabysyn jasyrǵan 74 000 otbasyny anyqtadyq. Sosyn jaqsy úıde turatyn jáne kólik minetin adamdar da "ASP" alyp kelgen. Tabysymyz joq deıdi. Qalaı joq? Ekiqabatty kottedjiń bolsa, áleýmettik kómekke muqtaj adamdardan aıyrmashylyǵyń bar ǵoı", - dedi Nurymbetov "Nur Otan-nyń" qoǵamdyq qabyldaýynda.

Mınıstrdiń málimetinshe, qazirgi tańda ýchaskelik komıssııalardyń jumysy kúsheıtilip jatyr. Komıssııa músheleri ótinish bergen adamǵa baryp, onyń jaǵdaıyn anyqtaýy qajet.

"Biz ýchaskelik komıssııalarǵa zańnama turǵysynan tıisti jaǵdaıdy jasap jatyrmyz. Olar "ASP-ǵa" ótinish bergen adamdardyń jaǵdaıyn tekserip úlgerýi kerek. Sondyqtan zańǵa tıisti talaptardy engizip otyrmyz. Ol adamnyń úlken úıi bolsa, oǵan "ASP-ny" bermegen durys shyǵar", - dep atap kórsetti Nurymbetov.

Onyń pikirinshe, mundaı kómekti tabysy kedeıshilik sheginen tómen azamattar ǵana alýy qajet.

"2002 jyldan beri ataýly áleýmettik kómek osy sanattaǵy adamdarǵa ǵana ústemaqy retinde tólenip keldi. Sondyqtan biz sol júıeni qaıtaryp jatyrmyz. Májiliske jańa zań jobasyn engizdik. Qudaı qalasa, jańa jaldan bastap "ASP-ny" tóleý júıesin retke keltiremiz", - dep túıindedi mınıstr.