06 Qarasha, 2019 Saıasat

"Mánizorov isi" Qazaqstannyń aqparat qaýipsizdigi qaı deńgeıde ekenin kórsetti

vlast.kz

Aıdan atsam ýaqyttan beri Almaty oblysy ákiminiń orynbasary Baǵdat Mánizorovtyń aty-jóni baspasóz betterinen túser emes. Áýeli qyrkúıek aıynyń sońynda onyń ustalǵany, qyzmettik jaǵdaıyn paıdalanyp, asa iri kólemde alaıaqtyq jasady degen kúdikke ilingeni habarlandy. Artynsha bultartpaý sharasy úı qamaqqa aýystyryldy, 18 qazanda qamaýda emes, demalysta delindi. 29 qazanda Qazaqstan Respýblıkasynyń Bas prokýratýrasy Mánizorovqa qatysty isti toqtatyp, ákim orynbasary 30 qazanda qyzmetine oraldy. Al jemqorlyqqa qarsy kúres qyzmet agenttigi prokýratýranyń sheshimimen kelispeıtinin málim etti. Osyndaı oqıǵalarǵa toly bolǵan "Mánizorov isi" týraly reseılik aqparat aıdynynda da az jazylmapty. Keı saıttar is materıaldaryn jarııalap, rastalmaǵan derekterdi taratqan.

"Mánizorov isiniń" barysy, onyń ne úshin ustalyp, qalaı bosaǵany týraly "aqparat" bergen morkovka.org, seychas.infobagnet.orgkompromat1.live syndy birneshe saıt derekkóz retinde qazaqstandyq regtv.kz portalyndaǵy Igor Sadykov atty jýrnalıstiń maqalasyna silteme jasaǵan. Bul saıt Qazaqstanda buǵattalǵanǵa uqsaıdy. Oǵan VPN arqyly ǵana kirý múmkin. Jýrnalıst Almaty oblysy ákimi orynbasary isiniń barysyn tergeý materıaldarynyń kóshirmesine súıenip jazǵan. "Jýrnalıstik zertteýdegi" beıtaraptyq týraly aıtýdyń ózi artyq. Maqala tolyqtaı negatıvti-emosıonaldyq aýanǵa, qaralaýǵa, rastalmaǵan pikirge toly. Al qupııa qujattardyń onyń qolyna qalaı túskeni belgisiz. Ádette jýrnalısterge qandaı da bir maǵlumat berýde sarańdyq tanytatyn quqyq qorǵaý organdarynyń ókilderi tutastaı tergeý materıaldarynyń jelige tarap ketýine jol berip qoıǵanyn nege joryrymyzdy bilmeımiz. Atalmysh qujattyń birsypyrasy, dálirek aıtqanda Mánizorovqa o basta taǵylǵan aıyptyń qujattary resmı málimdeme jasalmastan buryn JEXENNEWS telegram-kanalynda "qydyryp" júrgeni de belgili.

Taqyrypqa qatysty bolǵan soń aıta ketelik, Qazaqstanda keıbir memlekettik vedomstvolardyń baspasóz qyzmeti men aqparatty jedel taratý uǵymy birine-biri kereǵar túsinik pe dep qalasyń. Gollıvýd fılmderindegi basty keıipker jaýlardy jalǵyz jaıratyp bolǵan soń, "ýıýyldap" jetetin polıseıler sııaqty bizdegi resmı málimdemeler de oqıǵa bolyp, ótirik-shyny aralas sóz tarap, áleýmettik jeliler shýlap, qoǵam dúrlikkende baryp qana berilip jatady. Al aqparatty jedel taratýda áleýmettik jelilerge, onyń ishinde telegram-kanaldarǵa jeter júırik tabylmaı tur búginde. Resmı qabyldanǵan sheshimder jarııalanbastap jatyp, onyń mazmuny atalmysh áleýmettik jelidegi resýrstardy sharlap ketip jatqanyn únemi kórip júrmiz. Bul – áýeli memlekettiń aqparat saıasaty salasyndaǵy operatıvtiliktiń jetispeýshiligi men ishki qujattardyń jylystaý derekteriniń tyıylmaı otyrǵanynyń kórinisi. Sońǵysynyń aldyn alý tásilderiniń biri retinde memlekettik qyzmetkerlerge smartfon ustaýǵa tyıym salynýynyń kómegi kóp bolmady. Aıtpaqshy, Mánizorovqa qatysty istiń toqtatylǵany jóninde alǵash @yyedilov telegram-kanalynda habarlaǵanyn aıta ketken jón bolar.

Já, aqparattyq qaýipsizdiń máselesine oralalyq. Sheteldik saıttardyń jerden jeti qoıan tapqandaı qazaqstandyq shendiniń isi týraly jarysa jazýynyń astarynda nendeı maqsat-múdde bary anyqtalýy qajet. Olardyń Qazaqstannyń ishki máselelerine aralasyp, memlekettik qujattardy jarııalaıtyndaı, aqparat keńistigine enip, resmı rastalmaǵan derekterdi taratatyndaı qandaı alty alasy, bes beresi bary da zerdelenýi kerek. Meıli ǵoı, jazsa, jazsyn. Olarǵa qaqpaq bolar jaıymyz joq. Biraq rastalmaǵan derek taratyp, beıtaraptylyqty saqtamaı, jappaı qaralap jazylǵan "jýrnalıstik zertteýdi" jarııalap, soǵan jaqtasýy kemi kásibı ádepsizdik. Al Mánizorovtan bólek, joǵary shendi – Ahmetjan Esimovke, QR bas prokýrotýrasyna kúıe jaǵýy quqyqtyq jaýapkershilikke tartýǵa turarlyq aıyptaýlar.

Maqalada orynsyz jala jabýdan bólek, derekter burmalanyp, jańsaq pikir qalyptastyrýǵa tyrysýshylyq baıqalady. Baǵdat Mánizorovtyń úlken saıasatqa kelgenge deıin tabysty kásipker bolǵany aıtylmaı, onyń ıeligindegi menshikti shendi bolǵan tusta jemqorlyqpen tapty degenge saıatyn oı jetkiziledi.

Baǵdat Mánizorovqa qatysty osyndaı aýandaǵy áńgimelerdiń kóbi onyń 2008-2017 jyldary Almaty qalasy Alataý aýdany ákimi bolǵan kezeńine qatysty aıtylady. Alaıda 2008 jyly jańadan qurylǵan Alataý aýdanyndaǵy shash etekten bolǵan sharýany ákimniń meılinshe oń sheshkenin sol jaqtyń turǵyndary jaqsy biledi. Naqty sıfrǵa kelsek, Mánizorov ákim bolǵan tusta aýdanda 9 mektep ashylyp, bilim oshaqtaryndaǵy shamadan tys artyp ketken júkteme azaıtyldy. 4 jańa emhana boı kóterdi. 51 shaqyrym jol salynyp, 20 shaqyrym jol jóndeldi. 158 983 shaqyrymǵa aryq salynyp, 3,7 shaqyrym aryq jóndeýden ótti. 100 shaqyrymdyq elektr jelileri tartylyp, 78 shaqyrymy jóndeldi. 331 shaqyrym kóshege jaryq júrgizildi. Aýdan aýmaǵynyń 95 paıyzy gazben qamtamasyz etildi. 74 shaqyrym sý júıesi, 24 shaqyrym káriz júıesi júrgizildi. "Aqbulaq", "Alǵabas-6", "Saıaly" yqshamaýdandary salynyp, "Nurkent", "Aqkent" turǵyn-úı keshenderi turǵyzyldy.

"Almaty Arena" muz aıdyny, atletıkalyq aýyl, "Alataý" dástúrli óner teatry, mamandandyrylǵan halyqqa qyzmet kórsetý ortalyǵy da Mánizorov tusynda salynǵan ǵımarattar. Aýdan aýmaǵyna kiretin "baraholkadaǵy" bazarlar zaýanaýı keıipke enip, "О́jet", "Arlan", "Qazyna", "Kenjehan-2" bazarlary, "Alataý", "Domıllıon", "Magným", "Arzan" saýda ortalyqtary  salyndy. Búginde Alataý aýdanynda úlken qarqynmen damyp kele jatqan ındýstrııaldyq aýmaqtyń qazyǵy osy kezde qaǵylyp, alǵashqy jobalar júzege asyryldy.

Eń bastysy – 5 400 zańsyz, óz betimen basyp alynǵan jer telimderiniń zańdastyrylýyna muryndyq bolyp, aýdandaǵy jer máselesi 95 paıyzǵa sheshildi.

"Mánizorov isindegi" aq-qarany anyqtaý – quzyrly organdar enshisindegi sharýa. Bizdiki tek memlekettik qujattardyń jylystaýy, sheteldik aqparat kózderiniń Qazaqstannyń aqparat aıdynyna yqpaly, eldiń ishki isine aralasýy sekildi aqparattyq qaýipsizdik salasyndaǵy máselelerge nazar aýdarý. Bul iske memlekettik qyraǵy kózqaras, bıliktiń nazary kerektigin aıtý.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir