Búgin, 3 qarashada Las-Vegastaǵy "MGM Grand" kesheninde ótken boks keshiniń basty jekpe-jeginde meksıkalyq Saýl Alvares reseılik Sergeı Kovalev jeńip, jartylaı aýyr salmaqta (79,4 kg) WBO tujyrymy boıynsha álem chempıony atandy.
Qos boksshynyń arasyndaǵy chempıondyq jekpe-jek 12 raýndqa josparlanǵan edi, biraq jekpe-jektiń 11 raýndtynda Kanelo (meksıkalyq boksshynyń laqap aty) Kovalevti nokaýtqa túsirip, merziminen buryn jeńiske jetti.
Bul - 29 jastaǵy meksıkalyq boksshynyń jartylaı aýyr salmaqta (79,4 kg) judyryqtasqan alǵashqy jekpe-jegi. Ol buǵan deıin bes salmaqta judyryqtasyp, onyń tórteýinde álem chempıony atanǵan. Kásipqoı boksty 15 jasynda bastaǵan Alvares karerasynda 56 jekpe-jek ótkizip, 53 ret jeńiske jetip, bir ret qarsylasynan ese jiberip, eki kezdesýde teń nátıjege qol jetkizgen. Ol 2017 jyly qazaqstandyq boksshy Genadıı Golovkınmen teń túsip, 2018 jyldyń qyrkúıeginde Golovkındi jeńip ketti. Qazir Alvares kásipqoı boksshylardyń reıtıngin jasaıtyn boxrec.com saıtynyń tiziminde 1636 upaımen kósh basynda tur (kásipqoı bokstaǵy barlyq salmaq boksshylarynyń nátıjesin esepke alǵanda).
Alvareske ese jibergen Kovalev kásipqoı bokstaǵy tórtinshi jeńilisine ushyrady. Buǵan deıin 39 jekpe-jek ótkizgen ol 2016, 2017 jyly amerıkalyq boksshy Andre Ýordqa eki ret ese jiberse, 2018 jyly Kovalevty Eleıder Alvares (Kolýmbııa) utqan bolatyn.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir