Alty jyldan keıin Sırııadan oralǵan áıeldiń janaıqaıy (vıdeo)

Sırııadan oralǵan Aqjaıyq turǵyny basynan keshken qasiretteri  týraly  stýdenttermen kezdesý barysynda bólisti – dep Qamshy.kz aqparat agenttigi habarlaıdy, "Astana" telearnasyna silteme jasap.

Qazaqstanda sońǵy 7 jyldyń ishinde  terrorızm men ekstremızm turǵysynda 9 shabýyl jasalyp,  túrmelerde 700 adam jazasyn ótep jatyr. Onyń ishinde burynǵy sodyrlar da bar.

Mamandardyń aıtýynsha, olardyń jartysynan jýyǵy dinge degen kózqarasyn ózgertken. Olarmen búgingi tańda psıhologtar men teologtar jumys isteıdi. Aldaǵy ýaqytta BUU mamandary eldegi radıkaldarǵa qarsy is-qımyl jasaıdy.

Jýyrda Sırııadan oralǵan Aqjaıyq turǵyny Albına Mansurova basynan ótken aýyr jaǵdaıdar men zorlyq-zombylyqtar týraly baıandady.

Onyń aıtýynsha kúıeýimen birge Sırııaǵa ketip, alty jyl turǵan. Alaıda, qaqtyǵys aımaǵynan shyǵý ózi men balalary úshin ońaı bolmaǵan.  Kóz aldynda kún saıyn adamdardyń qyrylǵanyn kórgen. Tipten, ash qalmaý úshin balalarymen birge shóp jeýge týra kelgen.

Albına Qazaqstanǵa kelgenge deıin paranja kıse, elge oralǵan soń jabyq kıim kııýdi qoıyp,  shashyn jaıyp, makııaj jasap syrt kelbetin túbegeıli ózgertken.

"Ol jerde ádiletsizdik, qatygezdik, agressııa, jappaı óltirýler men ashtyq boldy. Men munyń bári saıasat bolǵanyn túsindim. Dinge esh qatysy joq. Sondyqtan ol jerden shyǵý jolyn izdeı bastadym. Qazaqstanǵa oralyp, ózimdi jáne balalarymdy qutqarýym kerek boldy",  – deıdi ol.

Qazirgi tańda Mansurova Sırııaǵa ketýdi josparlaǵandardy qutqarýǵa bar kúshin salmaqshy. Kezdesý barysynda stýdentterge óziniń taǵdyryn qaıtalamasyn degen úmitpen bastan keshken qasiretin aıtty.

Qazaqstanda eki jyldyń ishinde 300 tutqyn dástúrli dinı kózqarastarǵa oraldy

"Qaqtyǵys aımaǵynan oralǵandarmen jumys júrgizýdiń jańa tásilderi kerek. О́ıtkeni bizdegi ekstremıster men terrorıster bólek sanatta, al qaqtyǵys aımaǵynan oralǵandary múldem basqasha. Quzyrly organdar olarǵa qatysty arnaıy jumys ádistemesin ázirleıdi", – dedi Bas prokýratýranyń quqyqtyq statıstıka jáne arnaıy esep komıtetiniń tóraǵasy Qaırat Jaqypbaev.

Eske salsaq, "Jýsan" gýmanıtarlyq operasııasynyń nátıjesinde Sırııadan 600 qazaqstandyq qaıtaryldy. Olardyń 30-y er adam, 137 áıel jáne 406 bala.