Qytaı azamattarynyń isinde kim jaýapqa tartylady?

Qytaıdyń eki azamaty Qazaqstanǵa zańsyz ótti. UQK shekara qyzmetiniń dırektory Darhan Dilmanov buǵan jol bergender jaýapqa tartylatynyn málim etti, – dep Qamshy.kz aqparat agenttigi habarlaıdy.

"Memlekettik shekara senimdi qorǵalady, jabyq. Alaıda adam faktory bar. Bul máseleni taldap jatyrmyz. Jan-jaqty zerttep, memlekettik shekarany qorǵaýdyń keıbir tusyn ózgertemiz",  –dep Darhan Dilmanov májilis kýlýarynda jaýap berdi.

Onyń aıtýynsha, bul fakti boıynsha shekara qyzmetinde tergeý júrgizilgen. Kináliler anyqtaldy.

"Tártiptik jaza qoldanylatyny anyq. Árıne, sarbazdar emes, laýazymdy tulǵalarǵa jaýapqa tartylady. Bólim komandıri qyzmetinen bosatyldy", – dedi shekara qyzmetiniń basshysy.

Qytaı azamattaryna qatysty is Qylmystyq kodekstiń 392- baby ("Memleket shekarasyn qasaqana kesip ótý") boıynsha qarastyrylady. Zańǵa sáıkes, kináliler bir myń aılyq eseptik kórsetkish (2 mıllıon teńgege jýyq) aıyppul tóleıdi nemese bir jylǵa deıin bas bostandyǵynan aıyrylyp, elden qýylady. Sondaı-aq 5 jyl boıy Qazaqstanǵa kire almaıdy.

"Olar qazir tergeý ızolıatoryna qamaldy. Qazaqstan zańnamasyna sáıkes, eki aı tergeý júrgiziledi. Budan soń memlekettik shekarany zańsyz kesip ótýge qatysty sot otyrysy ótedi. Olarǵa ózge aıyp taǵylyp otyrǵan joq", – dedi Dilmanov.