"Nurly jer" baspanamen qamtýda balamasy joq baǵdarlamaǵa aınaldy

Búgingi kúnde óńir turǵyndaryn baspanamen qamtý eń ózekti másele sanalady. О́ıtkeni baspana kezeginde turǵan azamattardyń suranysyn qanaǵattandyrý óńirlerdegi áleýmettik-ekonomıkalyq damýdy eksheýde basty kórsetkishtiń birine aınaldy. Bul oraıda, Jambyl óńiri Qazaqstan-Respýblıkasynyń Tuńǵysh Prezıdenti-Elbasy Nursultan Nazarbaevtyń bastamasymen iske qosylǵan «Nurly jol» memlekettik baǵdarlamasynyń múmkindigi molynan paıdalanýda, dep jazady Qamshy.kz aqparat agenttigi. 

Jambyl óńirinde atalǵan memlekettik baǵdarlamany iske asyrý maqsatynda bıyl jalpy somasy 20 mıllıard 200 mıllıon teńge bolatyn qarjy bólindi. Bul qarjyǵa 30 turǵyn úı men 187 arendalyq páter satyp alyndy. Sondaı-aq oblystaǵy 15 turǵynúı alqabyndaǵy ınjenerlik ınfraqurylymmen damytý jobalary men 11 ishki alańda abattandyrý jumystary júrgizildi.

–Keler jyly memlekettik baǵdarlamaǵa qarastyrylǵan 18 mıllıard 300 mıllıon teńge qarjyǵa 38 turǵyn úı men 261 arendalyq páter satyp alý josparlanýda. Sondaı-aq óńirdegi 12 turǵyn úı alqaby ınjenerlik ınfraqurylymmen qamtamasyz etiletin bolady.

Jalpy aǵymdaǵy jyly oblystyń naqtylanǵan bıýdjetine sáıkes áleýmettik mańyzy bar, turǵyn úıler men ózge de ákimshilik ǵımarattardyń qurylysyn júrgizý jumystaryna 28 mıllıard 348 mıllıon teńge qarastyryldy. Atalǵan qarajattar esebinen óńirde barlyǵy 90 nysannyń qurylysy iske asyrylyp jatyr. Mundaǵy 70 nysandaǵy qurylysy jumystary aǵymdaǵy jyly aıaqtalady. Al qalǵan 20 nysan keler jyly paıdalanýǵa beriledi. Kúni búgingi kúnge deıin oblysta qurylysyn aǵymdaǵy jyly aıaqtaý josparlanǵan 21 nysandaǵy tıisti jumystar aıaqtalyp, tapsyrys berýshiniń balansyna berildi,–deıdi oblys ákimdiginiń qurylys basqarmasynyń basshysy Jaıyqbaı Shaldarov.

О́ńir turǵyndaryn atalǵan memlekettik baǵdarlama esebinen turǵyn úımen qamtýda eń áýeli kóp balaly jáne az qamtylǵan otbasylar sanatyna basymdyq berilýde. Sáıkesinshe búgingi kúnde oblysta 1768 kópbalaly otbasynyń turǵyn úı kezeginde turǵany anyqtaldy. Endigi kezekte baspanamen qamtý sharalarynda turǵyndardyń dál osy sanatyna aıryqsha mán beriledi. Búginde Taraz qalasynyń ózinde dál osy sanatqa jatqyzylatyn otbasylarǵa arnap 4 áleýmettik jataqhana qurylysy júrgizilip jatyr. Jeltoqsan aıynda aıaqtalatyn jataqhanada 180 otbasy baspanamen qamtylatyn bolady.