Taraz qalasynda 138 kóshe jóndelip jatyr

Taraz qalasynyń aýmaǵynda birqatar joldar men kóshe burylystarynda, tuıyqtarda jóndeý jumystary qarqyndy júrgizilýde, dep jazady Qamshy.kz aqparat agenttigi. 

Búginde Taraz qalasyndaǵy jalpy uzyndyǵy 78, 022 shaqyrym bolatyn jol, ıaǵnı 138 kóshe jáne burylystar men tuıyqtarda jóndeý jumystary qolǵa alynǵan. Mundaǵy 85 ýchaskede asfalttaý jumystary júrgizilse, 20 kóshe men 3 burylysqa asfalt jabyndysy tóselýde. Qazir bul jumystar óz máresine jetip qaldy. Sonymen qatar oblys ortalyǵyndaǵy 46 kóshe men 14 burylys, 2 tuıyqqa asfalt jabyndysyn tóseýge daıyndyq jumystaryna da qan júgirdi. Sondaı-aq osy jumystar sheńberinde qaladaǵy barlyǵy 1 330 kóshede jaıaý júrginshilerge arnalǵan jol salý máselesi de kún tártibine qoıylyp otyr.

Qala ishindegi joldardy jóndeý jumystary shahardyń «Taıvan» alqabynda qarqyn alǵan. Munda uzyndyǵy 27,7 shaqyrym bolatyn 18 kóshege tas tóselip, jóndeý jumystary júrgizilip jatyr. Búginde atalǵan alqaptaǵy 14 kóshege tas jol tóseldi. Taraz qalasyndaǵy kóshelerdi jóndeý jumystaryna jalpy somasy 481 mıllıon 564 myń qarjy qarastyrylyp otyr.

О́z kezeginde uzaq jyldan jóndeý kórmegen kóshedegi qurylystyń qarqyny jergilikti turǵyndardyń kóńilinen shyǵýda.

–«Taıvan» alqabyndaǵy D. Mendeleev kóshesinde turyp kele jatqanyma qyryq jyldan asty. Osy ýaqyt aralyǵynda kóshege jóndeý jumystary júrgizilgen joq. Bizdiń kósheniń turǵyndary jol azabyn bir kisideı tartty. Ásirese jaýyndy kezderi batpaqtan aıaq alyp júrý múmkin emes edi. Amalsyzdan aıaq kıimniń syrtynan plastık paket kıgen kúnder de boldy. Endi mine Asqar Myrzahmetovtiń bastamasymen kóshemizge jóndeý jumystary júrgizile bastady. О́ńir basshysyna kóshe turǵyndary atynan analyq alǵysymdy jetkizgim keledi, – deıdi «Taıvan» alqabyndaǵy D. Mendeleev kóshesiniń turǵyny Arýna Musabekova.

Jalpy óńirdegi sońǵy jyldary turǵyndar úshin qajetti ınfraqurylymdar júrgizý isinde ilkimdilik baıqalady. Ásirese kóshelerdi jóndeý isi qarqyndy júrgizildi. Buǵan deıin basty nazarda ortalyq dańǵyldar bolsa endigi kezekte shaǵyn aýdandar men qala syrtyndaǵy turǵyn alqaptaryndaǵy jol azabyn tartqan aǵaıynnyń jaı-kúıine basymdyq berilýde.