Jambyldyq sharýalar badam jańǵaǵyn ósirýge den qoımaq

Jambyl oblysynda badamsha (mındal) ósirý isi qolǵa alynbaq. О́zbekstan jerinde ǵana ósiriletin, mındal dáni kópshilik úshin asa jeńsik as sanalady. Baǵasynyń qymbattyǵyna qaramastan ósimdiktiń osy bir túrine suranys joǵary. Endigi kezekte ónimniń dál osy túrine degen jergilikti turǵyndardyń suranysyn óteýge jambyldyq sharýalar myqtap kirispek, dep jazady Qamshy.kz aqparat agenttigi. 

Bul bastamany jaqynda ǵana О́zbekstan Respýblıkasynan jumys saparynan oralǵan oblystyq kásipkerlik palatasynyń dırektory Oljas Qarjaýov kóterip otyr.

–Bizdiń oblystyń klımatynda badamsha dánin (mındal) ósirýge ábden bolady. О́kinishtisi sol sharýalar tarapynan kásiptiń bul túrine qyzyǵýshylyq joq. Esesine saýda oryndarynda kórshi elden nebári ár kelisi 3500-3800 teńgege ákelingen badamsha 5500 teńgege saýdalap jatyr. Qazir oblys ákiminiń bastamasymen aýyl turǵyndarynyń aýlasyndaǵy 10 sotyq jerdi maqsatty paıdalaný máselesi kóterilýde. Osy jerge badamsha dáni ósetin taldy egilse tórtinshi jyldan bastap ónim jınaýǵa bolady. Alǵashqy jyldary ár taldan 8 keli ónim jınalady. Birneshe tal egip odan jınalǵan ónimdi joǵary da kórsetilgen baǵada saýdalaý kól-kósir paıda ákeledi emes pe? О́z kezeginde bul jobany iske asyrýda ózbekstandyq áriptesterimiz kómek kórsetýge ázir. Sharýalar da daqyldyń osy bir erekshe túrin egý tájirıbelerimen bólispek, –dedi oblystyq kásipkerler palatasynyń dırektory Oljas Qarjaýov.

Onyń aıtýynsha О́zbekstan tarapymen qazir 10 000 túp badam kóshetin ákelý maqsatynda kelissózder júrgizilip jatyr eken. Eger bul kelissózder nátıjeli aıaqtalsa jambyldyq sharýalar qarasha aıynda badamsha egý jumystaryn bastaýǵa daıar. Ázirge badam kóshetterin Jambyl aýdanyndaǵy jeri qunarly, klımaty ońtaıly Aısha bıbi aýylyna egilmek. Al qalǵan bóligin Merki aýdanyna jersindirý josparlanyp otyr.

Jalpy kórshiles túrkistandyq sharýalarda badam jańǵaǵyn ósirý tájirıbesi bar. Badam aǵashtary 100 jylǵa deıin qýramaı tura beredi. Onyń alǵashqy 30-40 jylynda bul aǵashtan óte mol ónim alýǵa bolady. Dastarhannyń sáni bolýymen birge badam jańǵaǵynyń dáninde kezdesetin efır maıy densaýlyqqa óte paıdaly. Qazaqstanda jańǵaqty bul túriniń «Desertnyı”, “Iаltınskıı”, “Ýgamskıı”, “Nıkıtskıı”, “Ýrojaınyı» dep atalatyn suryptary ońaı jersinedi.