"Sáýleniń" vaflılerine suranys joǵary

Jambyl oblysynda jyl sanap kásipkerlik salasyna aıryqsha kóńil bólinip keledi. Ásirese «Bıznestiń jol kartasy 2020» memlekettik baǵdarlamasy jambyldyq kásipkerlerdiń ekinshi tynysyn ashty. Tuńǵysh Prezıdent-Elbasy Nursultan Nazarbaevtyń Qazaqstan halqyna jasaǵan Joldaýyna saı 2025 jylǵa deıin sozylǵan memlekettik baǵdarlama óńirdegi birqatar kásipkerlik nysandardyń jumysyn jolǵa qoıýda kádege jaraýda. Olardyń qatarynda Taraz qalasyndaǵy «Sáýle» kondıterlik fabrıkasy da bar, dep jazady Qamshy.kz aqparat agenttigi. 

Taraz qalasy ayp hımııa ónerkásibi kesheni bolýymen birge jeńilónerkásip nysandarynyń jumysy jolǵa qoıylǵan shahar retinde belgili. Tutynýshylar suranysyn óteý maqsatynda munda sońǵy jyldary tamaq ónerkásibiniń kókjıegi keńeıe túsýde. Memlekettik baǵdarlama kómegimen oblys ortalyǵynda joǵary sapaly kondıterlik ónimniń 34 túrin usyna alatyn «Sáýle» kondıterlik fabrıkasy da óz jumysyn bastady.

–Keıinnen kondıterlik fabrıka aınalǵan ǵımaratqa osydan 4 jyl buryn qol jetkizdik. Biz ónim óndirýde avstrııalyq HAAS kompanııasynyń jabdyqtaryn qoldanamyz. Qural jabdyqty alý jáne ondaǵy óndiristik jumystardy uıymdastyrý úshin Halyk Bank-ten 1 mıllıard 200 mıllıon teńge kóleminde nesıe aldyq. «Bıznestiń jol kartasy – 2020» memlekettik baǵdarlamasy arqyly «Damý» qory bankten alǵan nesıeniń 10 paıyzy sýbsıdııalandy. Kondıterlik fabrıkanyń óndiristik qýattylyǵy aıyna 250 tonna kondıterlik ónimdi quraıdy. Kásiporynda 30 adam turaqty jumyspen qamtylǵan. Bolashaqta óndiris oshaǵynyń óndiristik qýatyn eselep arttyryp, ondaǵy ónim túrlerin kóbeıtý josparda bar. Sáıkesinshe kondıterlik fabrıkadaǵy jumysshylar sanyn 200-ge deıin kóbeıtýge nıet etip otyrmyz,– deıdi «Sáýle» kondıterlik fabrıkasynyń dırektory Sáýle Janabekova.

Jalpy jylyna 2100 tonna ónim óndirýge qabiletti kásiporynnyń óndiristik qýatyn arttyrý baǵytyndaǵy aýqymdy josparlary barshylyq. Kondıterlik fabrıka qurylysynyń ekinshi kezeńi aıaqtalýy esebinen kásiporynnyń jyldyq qýattylyǵy 4500 tonnaǵa deıin artaq. Jeke kásipker keleshekte kondıterlik fabrıkanyń óndiristik qýattylyǵyn 12 000 tonnaǵa deıin ulǵaıtýǵa jospar qurýda.