"Zeınetaqy jınaqtary baspana men bilimge jumsalýy qajet"

Eńbek jáne halyqty áleýmettik qorǵaý mınıstrligi zeınetaqy jınaqtaryn merziminen buryn paıdalanýǵa qatysty birneshe usynys jasalǵanyn málimdedi. Bul týraly Qamshy.kz aqparat agenttigi  habarlaıdy.

Úkimet otyrysynan keıin jýrnalısterge suhbat bergen vıse-mınıstr Aqmádı Sarbasov osy máseleni talqylaý barysynda birneshe usynys qaralǵanyn, biraq, vıse-mınıstr naqty qandaı usynystar ekenin aıtpady. Sebebi, onyń aıtýynsha  jumys toby áli bir sheshimge kelmegen.

"Zeınetaqy jınaqtary baspana men bilimge jumsalýy qajet. Tapsyrma solaı boldy. Osyǵan baılanysty jınaqtardy paıdalanýdyń san alýan joldary qaralyp jatyr. Biraq ázirshe naqty nusqalar joq. Barlyq usynysty jan-jaqty zerdeleý kerek. Sebebi árbir adamnyń jınaǵan zeınetaqy jarnasy ártúrli", – deıdi Sarbasov.

Onyń aıtýynsha, naqty usynystar jyldyń aıaǵyna deıin ázirlenedi.

"Bizde tapsyrma bar. Jyldyń sońyna deıin naqty usynystar daıyn bolady. Jumys tobynyń jumysy jalǵasyp jatyr. Bir aıdyń ishinde keıbir máseleler pysyqtalady dep oılaımyn. Endi, dál qazir ózara kelisilgen usynystar joq. Sol sebepti ázirshe eshteńe aıta almaımyn", – dep sózin qortyndylady Sarbasov.

Eske salsaq, qyrkúıek aıynda  Prezıdent Qasym-Jomart Toqaev zeınetaqy jınaqtaryn paıdalanýǵa qatysty tapsyrma bergen bolatyn.

"Úkimetke jyldyń aıaǵyna deıin jumys isteıtin azamattar úshin zeınetaqy jınaqtarynyń bir bóligin maqsatty paıdalaný máselesin pysyqtaýdy tapsyramyn. Máselen, ol aqshany baspanany satyp alýǵa jáne bilim alýǵa jumsaýǵa bolady", – dedi memleket basshysy.