"Jambyl" qonaq úıinde murajaı jumys jasaıdy

Alǵashqy tutynýshylaryn osydan 58 jyl buryn qabyldaı bastaǵan Taraz qalasyndaǵy «Jambyl» qonaq úıinde ár jyldary Keńes odaǵyna, keıinnen táýelsiz Qazaqstanǵa tanymal azamattar aıaldaǵan. Olardyń qatarynda belgili saıasatkerler men kıno juldyzdar, estrada ánshileri de bar. Qala tarıhymen qatar órilgen qonaq úı tarıhynyń osy bir jarqyn sátterin este saqtaý maqsatynda onda «Keńes kezeńdegi «Jambyl» qonaq úıi» atty murajaı jumys jasaıdy, dep jazady Qamshy.kz aqparat agenttigi. 

Búginde týrıster arasynda tarıhı oryndarǵa degen qyzyǵýshylyq óte joǵary. Ásirese ol oryndardyń tarıhynda aty belgili tulǵalar iz qaldyrsa oǵan degen qyzyǵýshylyq tipten eselene túsedi. Al tutynýshylaryn qabyldaı bastaǵan jarty ǵasyrdan astam ýaqyt ishinde «Jambyl» qonaq úıi túrli tarıhı kezeńderdi bastan ótkerdi. Onyń alǵashqy 30 jyly keńestik dáýirmen tuspa-tus keldi. Sondyqtan munda alyp odaqqa aty belgili memleket jáne óner qaıratkerleri, aqyn-jazýshylaryna ýaqytsha meken etti.

Mine osynaý tarıhı erekshelikti qaz-qalpynda saqtaý maqsatynda qonaq úıdiń bir bólmesine murajaı uıymdastyryldy. Murajaıǵa engen sátten týrıster keńestik dáýirge tap bolǵandaı kúı keshedi.Keńestik jıhaz, tipti aspaly shamǵa deıin ótken ǵasyrdyń 60-jyldarynan habar beredi. Tósek oryndary men ózge de jabdyqtar jarty ǵasyr burynǵy qaz-qalpynda. Murajaı bólmesine jetkenge deıin kez kelgen adam qonaq úıge ár jyldary ornalasqan tanymal adamdardyń aty-jóni jazylǵan tizimmen tanysa alady. Bul tizimde Qazaqstan Respýblıkasynyń Tuńǵysh Prezıdenti-Elbasy Nursultan Nazarbaev ta bar.Nursultan Ábishuly bul qonaq úı bólmesinde QazaqKSR-niń Mınıstrler kabınetiniń tóraǵasy bolyp turǵanda oblysqa kelgen kezekti issaparlarynyń birinde turǵan kórinedi.

Tarıhı derekte «Jambyl» qonaq úıi men burynǵy kók bazar mańynda Jambyl eskertkishi aqynnyń 115 jyldyǵyna oraı bir kúnde paıdalanýǵa berilgenin aıǵaqtaıdy. Osylaısha búginde zamanaýı úlgide jabdyqtalyp óńirge qyzmet babymen, saıahattaý maqsatymen kelgen kez kelgen talǵamdy tutynýshyǵa sapaly qyzmet kórsete alatyn nysanda sonaý keńestik dáýirdegi Taraz tarıhynan syr shertetin murajaı qyzmet kórsetýde.