209 eldi meken aýyz sýǵa qol jetkizedi

Sý – tirshilik kózi. Onyń adam ómirindegi mańyzy barshaǵa aıan. Sondyqtan da búginde eldi mekenderdiń aýyz sýmen qamtylýy máselesi kún tártibine ótkir qoıylýda. Sáıkesinshe Jambyl oblysynda jyl sońyna 209 eldi meken turǵyndary ortalyqtandyrylǵan aýyz sýdy paıdalaný múmkindigine ıe bolady. Nátıjesindeshi óńir turǵyndardyń aýyz sýmen qamtylýy kórsetkishi 56 paıyzǵa jetkizilmek, dep jazady Qamshy.kz aqparat agenttigi. 

Halyqty aýyz sýmen qamtý isinde Elbasynyń tapsyrmasyna saı sýmen jabdyqtaý jáne sý burý júıelerin damytý jónindegi «2020 jylǵa deıin óńirlerdi damytý» baǵdarlamasy iske asyrylýda. Búginde oblys aýmaǵyndaǵy aýyldyq eldi mekenderdiń 53,3 paıyzy ortalyqtandyrylǵan aýyz sýmen qamtylǵan. Al óńirdegi 4 qala turǵyndarynyń ortalyqtandyrylǵan sýmen qamtylý kórsetkishi 88 paıyzdy qurady.

Bıyl bıýdjetten Taraz qalasynyń sýmen qamtý boıynsha 2 jobaǵa jalpy quny 1 mıllıard 775 mıllıon 200 myń teńge qarastyrylyp otyr. Sonymen birge aýdandardaǵy aýyldyq eldi mekenderdi sýmen qamtýǵa baǵyttalǵan 16 jobaǵa 5 mıllıard 222 mıllıon 700 myń teńge qarjy bólingen. Munan bólek tarazdyqtardyń aýyz sýmen qamtylý kórsetkishin 100 paıyzǵa jetkizý úshin 7 joba ázirlenip jatyr. Bul jobalardy iske asyrý nátıjesinde Taraz qalasy mańyndaǵy «Shalǵaı Qarasý – 1,2,3,4,5,6,7», «Qaınar», «Mıchýrınes», «Aqjol», «Rodnıchok», «Tekturmas», «Qarasaı», «Baryshan», «Shóldala», «Qumshaǵal», «Qyzyl Abad», «Kazarma», «Kóltoǵan», «Jıdeli» syndy saıajaılar men turǵyn alqaptarynyń turǵyndary sapaly aýyz sýǵa qol jetkizedi. Al Shý aýdanyndaǵy Shý qalasy boıynsha qazirgi tańda 7 myńnan astam halyq turatyn «Qosqudyq» alqabynyń sýmen qamtý júıeleriniń qurylys jobasy ázirlenip, saraptama qaraýyna tapsyrylyp qoıdy. Qosqudyqtyqtardy sýmen qamtýy kerek jobanyń jalpy quny 300-350 mıllıon teńgeni quraıdy. Joba tolyqtaı iske asyrylǵan jaǵdaıda qala turǵyndarynyń 80 paıyzy ortalyqtandyrylǵan sý qubyr júıesine qosylady.

Oblys eldi mekenderindegi 8 joba boıynsha qubyr tartý jumystary óz mejesine jetip te qaldy. Sol arqyly jyl sońyna deıin Baızaq aýdanyndaǵy Talas, Sarykemer, Jýaly aýdanyndaǵy Qarasaz, Talas aýdanyndaǵy Qasqabulaq, Maıtóbe, Sarysý aýdanyndaǵy Igilik, О́ndiris, Shý aýdanyndaǵy Moıynqum, Moıynqum aýdanyndaǵy Qylyshbaı aýyldary sapaly sýǵa qoljetkizedi. Respýblıkalyq bıýdjet arqyly qarjylandyrylyp, qurylys jumystary ótken jyly bastalǵan Qordaı aýdanynyń Qasyq, Talas aýdanynyń Eseıhan, Sarysý aýdanynyń Arystandy jáne Qyzyldıhan, Shý aýdanynyń Abaı aýyldarynyń turǵyndaryna jyl sońyna deıin sapaly tirshilik nári qoljetimdi bolady. Sonymen qatar, Moıynqum aýdanyndaǵy Býrylbaıtal, Mırnyı, Qııaqty eldi mekenderin sýmen qamtý jobalaryn aıaqtaýǵa 596 mıllıon 400 myń teńge qarastyryldy. Jobaǵa saı qubyr arqyly turǵyndar Balqash kóliniń tazartylǵan aýyz sýyn qoldanbaq.

Budan basqa, salalyq mınıstrlikke 2020-2022 jyldardaǵy respýblıkalyq bıýdjetten qarjy bólýge 5 aýdannyń 14 aýyldyq eldi mekenine jańa sý qubyr júıeleri qurylysyn salý úshin 7 mıllıard 90 mıllıon 200 myń teńgege bıýdjettik ótinimderi ótinimder tapsyryldy.

Oblysta aýyz sýmen qamtylmaǵan eldi mekenderdi 2020-2022 jyldary aýyz sýmen qamtý josparyn halyqaralyq qarjy uıymdary men memlekettik-jekemenshik áriptestik aıasynda iske asyrý múmkindikteri qarastyrylýda.