Has sheber aýyldan shákirtter daıyndaı bastady

Mańǵystaýlyq Áýes Saǵynaeva bala kezden kıiz basyp, kıiz úı jabdyqtaryn jasap úırendi. Qolynan shyqqan buıymdaryna kópshilik qyzyǵa qarap, tamsanatyn edi. Osy salada arnaıy, joǵary bilim almasa da bilgirlerden úırengeni kóp boldy. Tynymsyz uzaq jylǵy eńbektiń jemisi de az bolmady. Mádenıet salasynyń úzdigi, Qazaqstan qolóner sheberleri Odaǵynyń múshesi, Mańǵystaý oblysy qolóner sheberleri Odaǵynyń prezıdenti, «Altyn oımaq» qolónerdi qoldaý qorynyń jetekshisi.Jaqynda Nur-Sultan qalasynda ótken qolóner sheberleriniń forýmyna baryp, sheberlik saǵatyn ótkizýiniń ózi onyń elimiz boıynsha aıtýly maman ekenin ańǵartsa kerek.

Oblystyq mádenıet basqarmasynyń qoldaýymen, Mańǵystaý aýdandyq kásipkerler palatasynyńuıymdastyrýymen Áýes sheber alǵash bolyp sheberlik saǵatyn Shetpe aýylynan bastady. Oǵan aýyldyń 20 qyz-kelinshegi qatysýda. Qolónerge qyzyqqan, alda kásip ashqysy keletin názik jandylardy úıretý tegin. Búgin olar kerege tańǵysh toqyp úırendi, kıiz basyp mashyqtandy. Mańǵystaý oblysynda umytylyp bara jatqan qazaqtyń dástúrli qol ónerin jańǵyrtý jáne kásipkerlikke baýlý aıasynda ótken sharaǵa  ÁýesSaǵynaevamen birge Mańǵystaý aýdanynda kıiz úı jabdyqtaryn jasaý, eski qolóner buıymdaryn qaıta jańǵyrtýmen aınalysyp júrgen «Asyl qazyna» jeke kásipkerliginiń basshysy KúmisQosbaı jáne óńirge belgili kıiz úı jabdyqtaryn, qazaqtyń qolónerin damytýǵa zor úles qosyp júrgen sheber SharqatTólemisova da qatysty. Úırengenderine dán rıza bolǵan qyz-kelinshekter Mańǵystaý aýdandyq «Atameken» ulttyq kásipkerlik palatasyna sheksiz alǵysyn bildirdi.

Jeke kásipker Janna Amanqulovanyń aıtýynsha, Áýes apanyń ózinen qolóner buıymdarynyń qyr-syryn úırený úlken mártebe. О́ıtkeni Mańǵystaýda odan ótken has sheber joqtyń qasy. Ulttyq ónerimizdi ulyqtap, ony urpaqtan urpaqqa jetkizý úlken ıgi is.

«Ulttyq qolónerimiz mádenıetimizdiń, salt-dástúrimizdiń bir bóligi. Ony keıingi urpaqqa mura qyp úıretip ketý paryzymyz dep sanaımyz. О́ıtkeni saf ónerdi jiti biletin sheberlerdiń jasy 70-ti alqymdap qaldy. Bilgenimizdi, boıymyzdaǵy sheberlikti jastarǵa sińirip jatqan jaıymyz bar. Týrızmdi damytqymyz kelse, mádenıetti de umytpaýymyz kerek. Elge kelgen týrıst tarıh pen mádenıetpen tanysqysy keledi. Byltyr japonııalyq týrıst qolóner sheberlerin aralaǵysy keldi. Endi arnaıy ortalyq qurylsa quba qup»,- deıdi sheber.

Sheberlik saǵatynda qatysýshylar tekemet, alasha toqý, kıiz basý, baý-basqur, kıiz úı jabdyqtaryn toqýdy úırenetin bolady. Shara sońynda olarǵa arnaıy sertıfıkattar tabystaldy. Endi olar óz kásipterin ashyp, ulttyq ónerimizdi dáripteýine bolady.

Áýes Saǵynaeva mundaı sheberlik saǵattaryn Mańǵystaýdyń barlyq aýyldarynda ótkizýdi josparlap otyr.