Qanat Islamnyń qarsylasy óz jeńilisin ádiletsiz dep esepteıdi (vıdeo)

Namıbııalyq sportshy Ýoltor Kaýtondokva (18-2, 17 KO) Qanat Islammen ótkizgen jekpe-jeginen keıin jýrnalısterge suhbat berýden bas tartty dep habarlaıdy Qamshy.kz aqparat agenttigi Tengrinews.kz saıtyn silteme jasap.

Sharshy alańnan shyǵyp bara jatyp, ol tek nátıjeniń ádiletsiz bolǵanyn aıtty.  Almatyda Balýan sholaq atyndaǵy sport saraıynda ótken boks keshinde olar WBO International belbeýi úshin jekpe-jekke shyqty.

10 raýndqa sozylǵan judyryqtasý qorytyndysy boıynsha, tóreshiler jeńisti Kanat Islamǵa berdi.

Orta salmaqta óner kórsetetin qazaqstandyq Qanat Islam (26-0, 21 KO) namıbııalyq sportshy Ýoltor Kaýtondokvany (18-1, 17 KO) jeńdi. Alǵashqy raýndtarda qos boksshy bir-birin zerttese, úshinshi, tórtinshi raýndtarda shabýyl jasaýǵa kiristi. Besinshi raýndta Qanat Islam joıqyn soqqy jumsap, Ýoltor Kaýtondokvany nokdaýnǵa túsirdi. Biraq namıbııalyq sportshy birden esin jıyp, jekpe-jekti jalǵastyrdy.

Altynshy, jetinshi jáne segizinshi raýndta namıbııalyq boksshy aıqyn basymdyq tanytty. Sol ýaqytta Qanat Islamdy qoldaý úshin jankúıerler Qazaqstan ánuranyn aıtty. Toǵyzynshy jáne sońǵy raýndta otandasymyz bar kúsh-jigerin jınap jyldamyraq qımyldaı bastady. Dese de, eki boksshynyń da sharshaǵany baıqaldy.

Eske salsaq, salmaq ólsheý rásiminde Qanat Islam qarsylasynan jeńil bolyp shyqqan - 71,900 keli, al Kaýtondokva tarazyda 71,950 kelini kórsetken. Aıta ketelik, 34 jastaǵy Ýoltor Kaýtondokvanyń boıy 35 jastaǵy Qanat Islamnan 10 santımetrge uzyn boldy. Munyń aldynda Qanat Islamnyń (26-0, 21 KO) menedjeri Nelson Lopes meksıkalyq Saýl "Kanelo" Alvarespen (52-1-2, 35 KO) jekpe-jek uıymdastyrý maqsaty týraly aıtqan edi. "Qazir segizinshi oryndamyz, biraq, birinshi bolǵymyz keledi. Basty maqsat osy. Bárin jeńýge daıarmyz. Búgin Ýoltermen, al erteń "Kanelomen" judyryqtasyp, ony jeńemiz. Ony Qazaqstanǵa alyp kelemiz. Golovkınniń qolynan kelmegendi jasaımyz. "Kanelonyń" artynan kez kelgen salmaqqa barýǵa daıynbyz. Sýper ortada bolsa, sol dıvızıonǵa baramyz. Jetemiz de, basym bolamyz. Qazaq eline osy jekpe-jekti syılaımyz", - degen Lopes.