Qasym-Jomart Toqaev álem tennısiniń juldyzdary Rafael Nadal men Novak Djokovıchpen kezdesti dep habarlaıdy Qamshy.kz aqparat agenttigi Aqorda saıtyna silteme jasap.
Memleket basshysy ataqty tennısshilerdi "Aqorda" rezıdensııasynda qabyldap, Rafael Nadal men Novak Djokovıchke Qazaqstanǵa kelgenderi jáne qaıyrymdylyq matchyna qatysatyndary úshin rızashylyǵyn bildirdi.
"Bul - qazirgi zamannyń dańqty tennısshileriniń oıynyn Qazaqstanda kórýge keremet múmkindik. Atalǵan matchtyń qaıyrymdylyq maqsatta ótip otyrǵany asa mańyzdy. Sizderdiń astanamyzǵa kelgenderińiz Qazaqstanda damyp kele jatqan tennıske úlken qoldaý ekeni daýsyz. Búgingi balalarǵa kórsetetin sheberlik sabaqtaryńyz olarǵa jaqsy úlgi bolady jáne shabyttandyrady dep senemin", - dedi Qasym-Jomart Toqaev.
Qazaqstandaǵy tennıstiń damýyna joǵary baǵa bergen Rafael Nadal men Novak Djokovıch Prezıdentke kezdesýge múmkindik jasaǵany jáne tennıske kórsetip otyrǵan qoldaýy úshin alǵystaryn aıtty. "Bul meniń Qazaqstanǵa úshinshi ret kelýim. Ár kelgen saıyn ásem Elordanyń kelbetinen rahat tabamyn. Degenmen bul jolǵy saparym erekshe. О́ıtkeni ǵajap "Aqorda" saraıynda О́zińizben kezdesýge múmkindik aldym", - dep atap ótti Rafael Nadal.
"Prezıdent myrza, Qazaqstanda tennıske kórsetken qoldaýyńyz úshin alǵysymdy bildirgim keledi. Biz elderińizde tennıstiń nasıhattalýyna jáne damýyna óz úlesimizdi qosatynymyzǵa qýanyshtymyz, - dedi Novak Djokovıch.
Qasym-Jomart Toqaev sportshylarǵa tabys tilep, Rafael Nadaldi shańyraq kóterýimen quttyqtady.
Qate tapsańyz, qajetti bólikti tańdap ctrl+enter basyńyz.
Pikir qaldyrý
pikir