Aqmola oblysynda zańsyz aǵash keskender anyqtaldy

Aqmola oblysynda 106 qaraǵaı aǵashy zańsyz kesildi, – dep Qamshy.kz aqparat agenttigi habarlaıdy, oblystyq PD baspasóz qyzmetine silteme jasap.

Baspasóz qyzmetiniń málimdemesinde, oblys aýmaǵynda qazannyń 5-31 kúnderi tabıǵatty qorǵaý zańnamasynyń qorǵalýyn qamtamasyz etý, bıologııalyq resýrstar ónimi men nysandarynyń zańsyz aınalymyn, ekologııalyq qylmystardy ashý baǵytynda «Brakoner» jedel aldyn alý sharasy ótip jatyr.

Aqmola oblystyq PD tabıǵatty qorǵaý polısııasy qyzmetkerleri men Orman sharýashylyǵy jáne janýarlar álemi komıtetiniń óńirlik organdary birlesip júrgizgen tekseris kezinde Keńes orman sharaýshylyǵy aýmaǵynda zańsyz ańshylyq oqıǵasy anyqtaldy.

Orman sharýashylyǵynyń qyzmetkerleri Keńes aýylynan 16 shaqyrym jerden 12 kalbırli 6 gılza men bir jyldyq bulannyń óleksesi tabylǵanyn habarlaǵan.

"Jedel izdestirý sharasy kezinde Stepnogorsk qalasynyń 30 jáne 37 jastaǵy eki turǵyny anyqtalyp ustaldy. Ekeýinen "MR-155", "SKS-366" jáne "Benelli M-4" markaly myltyqtar tárkilendi.

Osyǵan baılanysty birqatar saraptama taǵaıyndaldy. QR QK 337 babynyń 1-shi bóligi boıynsha is qozǵalyp, sotqa deıingi tergeý amaldary júrgizilýde", delingen vedomstvoda.

Sondaı-aq 8 qazan kúni Bulandy aýdanynyń Chernorechıa orman sharýashylyǵy aýmaǵynda 106 túp qaraǵaıdyń zańsyz kesilgeni belgili boldy.

"Bul qylmysqa kúdikti, 27 jastaǵy jergilikti turǵyny ustaldy. Onyń tabıǵatqa keltirgen shyǵynynyń kólemi 472 000 teńgege baǵalanyp otyr. Osyǵan baılanysty QR QK 340 babynyń 2- bóligi boıynsha is qozǵaldy. Dál osyndaı zańsyz aǵash kesý oqıǵasy 22 qazanda Sandyqtaý aýdanynda tirkeldi. Munda Novonıkolsk aýlynyń 44 jastaǵy turǵyny 45 qaraǵaı aǵashyn zańsyz kesken. Onyń ústinen de is qozǵaldy", – dep tolyqtyrǵan vedomstvoda.

Odan ózge "Brakoner" jedel aldyn alý sharasy barysynda arnaıy mobıldi top tabıǵatty qorǵaý zańnamasyna qatysty 136 zańbuzýshylyqty anyqtaldy. Onyń 80-i ań aýlaý, 22-i balyq aýlaý erejesine qatysty.

Sondaı-aq ańshylyq myltyǵyn qoldaný jáne tasymaldaýǵa qatysty 26 ákimshilik hattama toltyrylyp, 4 ańshy myltyǵy tárkilendi.