Túrkistan oblysynda para alǵandar ustaldy (vıdeo)

Túrkistan oblysy men Shymkent qalasynda ákimdiktiń eki birdeı qyzmetkeri para aldy degen kúdikke ilindi. Olardyń biri – bólim basshysy, al ekinshisi – aýyldyq okrýgtiń ákimi.

"Shymkent qalasynyń sybaılas jemqorlyqqa qarsy qyzmeti saýda jasaýǵa ruqsat berý jáne kásipkerlik qyzmetke jalpy qamqorlyq jasaý úshin azamattan jalpy somasy 65 myń teńge aldy degen kúdikke ilingen Ál-Farabı aýdany ákimdigi kásipkerlik bóliminiń basshysyna qatysty sotqa deıingi tergeýdi bastady", – dep habarlady sybaılas jemqorlyqqa qarsy is-qımyl agenttiginiń baspasóz qyzmeti.

Sondaı-aq osyǵan uqsas qylmys jasaǵany úshin Túrkistan oblysy, Jetisaı aýdany Qyzylqum selolyq okrýginiń ákimi de kúdikke ilindi. Ol jeke turǵyn úı qurylysyna jer telimin berý úshin 500 myń teńge somasynda para aldy dep aıyptalyp otyr.

Qazirgi tańda sotqa deıingi tergeý jalǵasýda. Kúdiktilerge qatysty sońǵy sheshimdi sot shyǵarady.