Berik Ýálı: Taǵaıyndaýǵa qatysty barlyq sheshimderdi prezıdent qabyldaıdy

Prezıdenttiń baspasóz hatshysy pikirtalas týdyrǵan ádilet mınıstri Marat Beketaevtyń sózine qatysty túsinikteme berdi.

Eske salsaq, Mınıstr kadrlyq taǵaıyndaýlarǵa qatysty "sońǵy sheshim – Qaýipsizdik keńesiniń quzyretinde" degen pikir aıtqan bolatyn.

"Ádilet mınıstriniń túsindirmesin qısynsyz dep sanaımyn. Múmkin Beketaev myrza tilshilerdiń qysymynan abdyrap qalyp, qate tujyrym jasaǵan bolar. Degenmen, mundaı joǵary deńgeıdegi laýazymdy tulǵa kez kelgen máseleni óziniń fýnksıonaldyq mindeti aıasynda árqashan biliktilikpen túsindirýi tıis", – dedi Berik Ýálı.

Sondaı-aq baspasóz hatshysy bul máselege túbegeıli núkte qoıǵysy keletinin atap ótti.

"Konstıtýsııa – negizgi zań. Qujatta memleket basshysynyń fýnksııasy men ókilettiligi anyq jazylǵan. Ártúrli kózqaras týǵyzǵan 2019 jyldyń 9 qazandaǵy jarlyqtyń erejesi bar. Soǵan sáıkes, prezıdent "Qazaqstan Respýblıkasynyń memlekettik saıası qyzmetshileri men ózge de laýazymdy adamdaryn qyzmetke kelisý, qyzmetke taǵaıyndaý jáne qyzmetten bosatý tártibi týraly erejede" kórsetilgen prosedýralardan tys sheshimderdi qabyldaýǵa quqyly", – dedi B. Ýálı.

"Ol tek prezıdent memlekettiń basty laýazymdy tulǵasy, Konstıtýsııanyń kepili, Joǵarǵy bas qolbasshysy ekenin atap ótti. Iаǵnı tek prezıdent konstıtýsııaǵa sáıkes, úkimet múshelerin, kúshtik qurylym basshylary men ózge de vedomstvolardyń jetekshilerin, sondaı-aq, óńirlerdiń basshylaryn taǵaıyndaýǵa qatysty sheshimderdi qabyldaıdy" – dep túıindedi óz sózin prezıdenttiń baspasóz hatshysy.