Sporttyq lıgalar shynaıy báseke alańyna aınalyp keledi

О́ńirdegi dene shynyqtyrý jáne sport salasyna aıryqsha kóńil bólingenin jekelegen lıgalarday sporttyq jarystardyń jıi ótkizilýinen de ańǵarýǵa bolady. Ásirese sońǵy jyldary mektep oqýshylary arasyndaǵy oblystyq «Mektep lıgasy» men memlekettik qyzmetshiler arasynda voleıboldan dástúrli túrde ótetin «Túngi lıgaǵa» qyzyǵýshylyq óte joǵary, dep jazady Qamshy.kz aqparat agenttigi. 

Jalpy jyl basynan oblys boıynsha salaýatty ómir saltyn nasıhattaý baǵytynda barlyǵy 2795 sporttyq is-shara uıymdastyrylyp, atalǵan is-sharalarǵa 459,4 myń adam qatysty.

–Onyń ishinde sońǵy tórt jylda dene shynyqtyrý jáne sport basqarmasy men bilim basqarmasy birlesip ótkizip kele jatqan oblystyq «Mektep Lıgasy» sporttyq oıyndaryna 130 myńnan astam oqýshy qatysýy úlken jetistik sanalady. Jastar arasynda salaýatty ómir saltyn qalyptastyrý, buqaralyq sporttyń tanymaldylyǵyn arttyrý maqsatynda kishi fýtbol, voleıbol, basketbol syndy sport túrlerinen ótkizilgen bul lıga oıyndary shyn máninde mektep oqýshylary arasyndaǵy báseke alańyna aınaldy. Nátıjesinde óńir jastarynyń 55,9 paıyzy dene shynyqtyrýmen turaqty túrde aınalysýdy bastady. «Mektep lıgasynyń» sońǵy 4 jyl boıy uıymdastyrylyp kele jatqanyn eskersek osy báseke alańynda úzdik shyǵý jolynda ter tókken mektep oqýshylarynyń búginde sporttyń jekelgen túrine myqtap den qoıǵanyn ańǵarý qıyn emes.

Sonymen qatar, óńirde salamatty ómir saltyn qalyptastyrý maqsatynda jyl basynan bastap fýtboldan áýesqoılar arasynda oblys chempıonaty jáne memlekettik qyzmetshiler arasynda voleıboldan «Túngi Lıga» oıyndary ótkizilip keledi. Sáıkesinshe bul syndarǵa qatysýshy komandalar sany men olardyń arasyndaǵy básekelestiktiń artýy áýesqoılar arasyndaǵy sporttyń jekelegen túrleriniń tanymal bolýyna septigin tıgizip keledi, –deıdi oblys ákimdiginiń dene shynyqtyrý jáne sport basqarmasynyń ataýy Nurbol Júnisbekov.

Sportpen aınalysýshy turǵyndary sanynyń artýyna qoljetimdi sport alańshalardyń kóbeıýi de óz septigin tıgizip jatqany daýsyz.Bul oraıda sport alańshalaryn salýǵa demeýshilerdiń kóbeıgenin atap ótpeske bolmas. Máselen jyl basynan beri 112 sport alańshasy salynsa onyń 54-i jekelegen azamattardyń qarjysy esebinen paıdalanýǵa berilgen.