4794 jambyldyq kásiporynda ujymdyq shart bar

Damyǵan qoǵamnyń basty belgisi eńbekshiler múddesiniń eskerilýi desek qatelese qoımaımyz. Bul oraıda kásiporyn men jumysker arasyndaǵy eńbek qatynasyn retteýshi ujymdyq shartpen qamtý ózekti másele sanalady. Qazaqstan Respýblıkasy Prezıdenti Qasym-Jomart Toqaev ta óz Joldaýynda eń áýeli qarapaıym eńbek adamdarynyń jaıyn oılap, jaǵdaıyn jasaýǵa basymdyq berýdi áleýmettik saıasattyń basty baǵdaryna aınaldyrý qajettigine toqtalǵan. Sáıkesinshe qazirgi tańda 4794 jambyldyq kásiporynda eńbekshi men ol qyzmet etetin uıym basshylyǵy arasyndaǵy eńbek daýy ujymdyq sharttyń talaptaryna saı sheshilip keledi, dep jazady Qamshy.kz aqparat agenttigi. 

Búginde oblys aýmaǵyndaǵy 4794 kásiporyn ujymdyq shartpen qamtylǵan. Bul ujymdyq shartpen qamtylǵan zańdy tulǵalardyń 54,3 paıyzyn quraıdy.

–Mundaǵy 1567 kásiporyn memlekettik menshikte. Onyń ishinde iri jáne orta kásiporyndar ujymdyq shartpen 100 paıyz qamtylǵan. Al shaǵyn memlekettik kásiporyndardaǵy qamtý kórsetkishi 98 paıyzdy quraıdy.

Sondaı-aq ujymdyq sharttarmen birge jumyskerlerdiń jumystan qysqartylýyna jáne eńbek quqyqtarynyń buzylýyna jol bermeý úshin ákimdikter men kásiporyndar arasynda óndiristik prosesterdi turaqtandyrý máseleleri boıynsha ótken jyly oblysta 8230 memorandým qabyldady. Bul memorandýmdar oblysta áreket etip turǵan zańdy tulǵalardyń 93,2 paıyzyn quraıdy. 2019 jyldyń 9 aıynda 4980 memorandým qabyldandy, –deıdi oblys ákimdigi eńbek ınspeksııasy basqarmasynyń basshysy Balabek Narbaev.

Sonymen birge basqarma tarapynan jeke jáne zańdy tulǵalarǵa eńbek zańnamasyn túsindirý boıynsha ádistemelik kómekter de kórsetilip, jumyskerlerdiń eńbek zańdylyqtaryn jetik bilýine yqpal etý jumystaryn uıymdastyrý turaqty jolǵa qoıylǵan. Atap aıtqan basqarma mamandarymen 1945 adamǵa eńbek qatynastary boıynsha túsindirme jumystary júrgizilse, 945 leksııa oqytylp, metodıkalyq kómekter kórsetildi.

–Munan bólek qyzmetker men jumys berýshi arasyndaǵy eńbek qatynastaryndaǵy máseleniń eńbek ınspektorlarymen tekserý kezinde eńbek zańnamasyn buzýdyń 180 faktisi anyqtaldy. Soǵan saı jumys berýshilerge 77 nusqama, 19 eskertý túrindegi ákimshilik shara jáne 34 aıyppul salynǵan. Salynǵan aıyppuldyń kólemi 5 mıllıon 226 myń 750 teńgeni quraıdy, –deıdi oblys ákimdigi eńbek ınspeksııasy basqarmasynyń basshysy Balabek Narbaev.