Jambylda áıelder densaýlyǵyn qorǵaý aılyǵy ótkizilýde

Memleket basshysy Qasym-Jomart Toqaevtyń «Syndarly qoǵamdyq dıalog-Qazaqstan turaqtylyǵy men órkendeýiniń negizi» atty Joldaýynda densaýlyq saqtaý salasyn damytý máselesine basa nazar aýdarylyp, bul baǵytta naqty mindetter aıqyndaldy.

Osy oraıda Jambyl oblysynda da birqatar jumystar atqarylýda. О́ńirde 2018-2019 jyldarǵa arnalǵan QR onkologııalyq aýrýlarmen kúresý týraly Keshendi josparyn iske asyrý maqsatynda 2019 jyldyń 6-27 qazan aralyǵynda áıelder densaýlyǵyn qorǵaý sheńberinde «Sút bezi qaterli isiginen habardar bolý týraly búkilálemdik kúnine arnalǵan aılyq» ótkizilýde.

Oblystyq onkologııalyq dıspanseriniń bas dárigeri Abaı Nurjanovtyń aıtýynsha, sút bezi qaterli isigi álemde, onyń ishinde bizdiń elimizde de ózekti másele bolyp otyr. Sút bezi qaterli isigin erte anyqtaý maqsatynda áıelderdi skrınıngtik tekserýden ótkizý jónindegi memlekettik baǵdarlamany iske asyrý der kezinde kóterilip otyrǵan másele. Bul óz kezeginde áıelder densaýlyǵyn korǵaýda úlken áserin tıgizip otyr.

Álem boıynsha jyl saıyn 1 250 000 jańa sútbezi qaterli isigi tirkeletin bolsa, elimizde jyl saıyn 4600-5000 jańa sút bezi qaterli isigi tirkeledi eken. Al aımaqta aǵymdaǵy jyldyń 9 aıynyń qorytyndysy boıynsha - 7201 áıel onkologııalyq aýrýlarmen esepke alynsa, onyń ishinde alǵashqy ret anyqtalǵany - 1110 aýrý. Degenmen aýrýshańdyq kórsetkishiniń azdap tómendeýi baıqalady eken.

– Onkologııalyq aýrýlardyń quramyna kelsek, sút bezi qaterli isigi - 10,9 paıyzdy quraıdy. Bul ekinshi orynda, birinshi orynda ókpeniń qaterli isigi - 11,6 paıyz, odan keıin asqazan qaterli isigi - 8,8 paıyz, toq, tik ishek qaterli isigi - 8,1 paıyz bolyp otyr. Sút bezi qaterli isigine toqtasaq, osy týraly aılyq ótkizilip jatqany belgili. Aǵymdaǵy jyldyń 9 aıynyń qorytyndysy boıynsha sút bezi qaterli isiginen - 1459 áıel esepte turady. Olardyń ishindegi alǵashqy ret anyqtalǵany - 121. 2019 jyly qaıtys bolǵandar sany - 49, 2018 jyly - 43, ıaǵnı ólim kórsetkishiniń azdap óskendigi baıqalady. Sút bezi qaterli isigin erte anyqtaýdyń bir tásili áıelderdiń sút bezi qaterli isiginen habardar bolýy. Sondyqtan osy aılyq júrgizilip jatyr. Ekinshiden 30 jastan asqan áıelderdiń jylyna 1 ret jergilikti emhanalardan áıelderdi tekserý kabınetinen ótý jáne nysanaly toptaǵy áıelderdiń sút bezi obyryn erte anyqtaýda skrınıngtik tekserýden ótýi jáne áıelderdiń sút bezi qaterli isiginiń alǵashqy belgilerin bilý. Osy másele boıynsha 2019 jyldyń naýryz aıynda «SALUS» kóp salaly medısına ortalyǵy jáne Qazaq onkologııa jáne radıologııa ǵylymı zertteý ınstıtýty profesory Nurlan Baltabekovtyń qatysýymen «Onkologııalyq aýrýlardy erte anyqtaý algorıtmi» boıynsha master-klass ótkizildi. Master klassqa BMSK salasynda isteıtin 77 medısınalyq qyzmetkerler qatysty. Bul sút bezi obyryn jáne kózge kórinetin qaterli isikterdi erte satysynda anyqtaýǵa kómegin tıgizedi, – deıdi Abaı Quralbekuly.