Jumyssyz jastar jeke kásipkerlikke den qoıýda

Elimizde sońǵy jyldary jastardy áleýmettendirý salasyna aıryqsha basymdyq berilip keledi. Qazaqstan Respýblıkasy Prezıdent Qasym-Jomart Toqaevtyń halqyna arnaǵan Joldaýynda da jastar jumyssyzdyǵy olardyń belsendiligi máselesine mán berilip, kórsetkishter men tıisti jumystardy ilgeriletýge naqty tapsyrmalar berilgeni málim. Jambyl oblysynda da jastardy áleýmettendirý isinde salalyq vedomstvolyq organdarmen jáne Taraz qalasy men aýdan ákimderi arasynda naqty mejeler aıqyndalǵan 11 ındıkatorlyq kórsetkishter belgilendi. Mundaǵy 7 kórsetkish jastardy jumyspen qamtýdyń belsendi sharalaryna tartýǵa baǵyttalǵan, dep jazady Qamshy.kz aqparat agenttigi. 

Aǵymdaǵy jyly óńirdegi jastar arasyndaǵy jumyssyzdyq deńgeıi 2,4 paıyzǵa azaıdy. Al respýblıka boıynsha bul kórsetkish 3,7 paıyz ekenin eskersek, Jambyldaǵy jastar jumyssyzdyǵyn joıýǵa baǵyttalǵan sharalardyń nátıjeligin atap ótýge bolady. Oblysta aǵymdaǵy jyldyń alǵashqy III toqsanynda NEET sanatyna jatatyn jastardyń úlesi 7,7 paıyzdy qurap, ótken jylmen salystyrǵanda 1,5 paıyzǵa kemidi.

–Jalpy bıyl Jambylda 11 myń jas jumyspen qamtýdyń belsendi sharalaryna tartý kózdelgen. Al aǵymdaǵy jyldyń qazanyna deıin 12 780 jas jumyspen qamtýdyń belsendi sharalaryna tartylyp úlgerdi. Olardyń 5940-y vakanttyq bos jumys oryndaryna ornalassa, 1337-i qysqa merzimdi kásibı oqytýǵa, 770 jas kásibı oqytýǵa jiberildi. Sonymen qatar 2297 túlek jastar tájirıbesine, 302-i áleýmettik jumys oryndaryna, al 1064-i aqyly qoǵamdyq jumystarǵa joldandy. Munan ózge 483 jas «Bıznes Bastaý» jobasymen kásipkerlik negizderine oqytyldy. Kásipkerlik negizderi boıynsha teorııalyq bilim alǵan 227 jas 976 mıllıon 100 myń teńgege shaǵyn nesıe aldy. Bul jastardyń kásipkerliktegi qazirgi jetistikteri kóńil qýantady. Olar osy kásip arqyly ózderin jumysyn qamtyp, armandaryna qol jetkizip qana qoımaı talaı jandy jumyspen qamtı aldy. Jas kásipkerler óndirgen ónimniń naryqta úlken suranysqa ıe bolǵanynda atap ótip kerek, –deıdi oblys ákimdiginiń jastar saıasaty máseleleri basqarmasynyń basshysy Serikbol Berikqoja.

Jastar jumyssyzdyǵyn joıýdyń kelesi bir baǵyty qaıtarymsyz granttar berýden kórinedi. Máselen «Eńbek» memlekettik baǵdarlamasynyń II baǵyty sheńberinde jastardyń jańa bıznes-ıdeıalaryn damytýǵa 200 aılyq eseptik kórsetkish mólsherinde 1129 jasqa qaıtarymsyz grant taǵaıyndaldy. Bul iske 570 mıllıon 100 myń teńge qarjy qarastyryldy. Al 360 jas 181 mıılıon 800 myń teńge qaıtarymsyz grant aldy.