"Shekarany kesip ótken" shyńjańdyq qazaqtar qamaýǵa alyndy

«Qazaq-qytaı shekarasyn kesip ótip, Qazaqstanǵa kelgen» Shyńjań qazaqtary Murager Álimuly men Qaster Musahanuly eki aıǵa qamaldy dep jazady Qamshy.kz aqparat agenttigi Azattyqtyń deregin negizge alyp. 

Bul týraly 21 qazanda olardyń qorǵaýshysy Lázzat Ahatova habarlady. Qorǵaýshynyń sózinshe, eki jigitke bultartpaý sharasyn belgileıtin sot otyrysy dúısenbi, 21 qazanda ótýi tıis bolǵan. Alaıda bul sot otyrysy aıaq astynan ózgerip 20 qazanda memlekettik qorǵaýshynyń qatysýymen ótip ketken.

– Sottyń jeksenbi kúni túste ótip ketkenin estip, tańǵaldyq. Sot tóraǵasy Nııaz Hasenovpen kezdesip, óz ýájimizdi jetkizdik. Sotty ótkizip, qaýly qabyldaǵan da sol kisi eken. Ol kisi bultartpaý sharasy adam qamaýǵa alynǵan saǵattan bastap 48 saǵat ishinde sheshilýi keregin, 18-i kúni qamaýǵa alynǵan Álimuly men Musahanulynyń ýaqyty keshe keshki 18.00-de aıaqtalyp jatqandyqtan, memlekettik advokattyń qatysýymen sotty ótkizgenin aıtty. Bizge, ıaǵnı advokattaryna "eskerttik" dedi. Biraq maǵan advokat retinde eshkim eskertken joq. Sondyqtan oblystyq sotqa appelıasııalyq shaǵym túsirdim, - dedi advokat Lázzat Ahatova Azattyqqa.

Qorǵaýshynyń sózinshe, shekarany kesip ótý asa aýyr qylmys sanatyna jatpaıtyndyqtan "eki aıǵa qamaý - aýyr jaza".

– Sýdıanyń tergeý aıaqtalǵanǵa deıin qolhatpen bosatýyna, úıqamaqta bolýy týraly qaýly shyǵarýǵa da quqyǵy bar edi, - deıdi advokat. Lázzat Ahatova erteń tańreteń qorǵaýyndaǵy azamatpen kezdesetinin aıtqan.

Al О́skemendegi tergeý ızolıatorynyń kezekti qyzmetkeri "mekemege jetkizilgen adamdar týraly qandaıda bir aqparatty tek týystaryna jáne tek mekeme ruqsatymen ǵana bere alatynyn" jetkizdi.

30 jastaǵy Qaster Musahanuly men 25 jastaǵy Murager Álimuly Dórbiljiń aımaǵynan jolǵa shyǵyp, 1 qazanda Qytaı shekarasynan ótkenderin aıtqan. О́zderiniń aıtýyna qaraǵanda, qazaq-qytaı shekarasy aralyǵyndaǵy beıtarap aýmaqta bes kúndeı júrip, qazannyń 6-sy kúni Shyǵys Qazaqsan oblysynyń Zaısan, Shilikti, Mańyraq aýyldarynyń tusynan Qazaqstanǵa ótken. Keıin jolaı taksı jaldap, 10 qazanda qazanda Almatyǵa "kelgen". 14 qazanda Almatydaǵy adam quqyǵyn qorǵaý bıýrosynda ótken baspasóz máslıhatynda Qaster Musahanuly Shyńjańdaǵy lagerde qamaýda otyryp shyqqanyn, al Murager Álimuly sol jaqta qysym kórgenin aıtqan. Baspasóz máslıhatynan keıin olardy shekara qyzmetiniń ókilderi alyp ketip, 15 qazanda tergeý amaldary úshin Shyǵys Qazaqstanǵa jetkizilgen.

UQK Shekara qyzmeti Qaster Musahanuly men Murager Álimulynyń ústinen Qylmystyq kodekstiń 392-baby 1 bóligi, ıaǵnı "Qazaqstan shekarasyn zańsyz kesip ótý" baby boıynsha tergeı júrip jatqanyn habarlaǵan. UQK-niń málimetinshe, Qaster Musahanuly buǵan deıin 2006 jyldyń 21 maýsymynda shekaranyń Qazaqstan jaǵyna ótip ketip keıin Qytaıǵa qaıtarylǵan. Shekara qyzmeti sol kezde onyń jylqy urlap, qylmystyq jaýapkershilikten qashyp shekara buzǵanyn aıtady.