Qarjylandyrý kólemi artýda

«Shaǵyn, ásirese, mıkrobıznes elimizdiń áleýmettik-ekonomıkalyq jáne saıası ómirinde mańyzdy ról atqarady. Atap aıtqanda, eń aldymen aýyl turǵyndaryna turaqty jumys beredi, jumyssyzdyqty azaıtady. Sonymen qatar salyq bazasyn qurap, jergilikti bıýdjetti nyǵaıtady. Sondaı-aq jappaı kásipkerlikti damytý sanaǵa sińgen paternalıstik pıǵyl men masyldyqtan arylýǵa múmkindik beredi. Elimizde kásipkerlikti damytýdyń úlgi bolarlyq mysaldary jetkilikti. Biz shaǵyn kásipkerlikti búkil qoǵam bolyp qoldaýymyz kerek». Memleket basshysy Qasym-Jomart Toqaev «Syndarly-qoǵamdyq dıalog – Qazaqstannyń turaqtylyǵy men órkendeýiniń kepili» atty halyqqa arnaǵan Joldaýynda osylaı dep atap kórsetip, qadaı-qadaý mindetterdi aıqyndap bergen bolatyn.

Memleket tarapynan jasalyp jatqan qolaıly jaǵdaılardyń nátıjesinde Jambyl oblysynda shaǵyn jáne orta kásipkerlik salasy qarqyndy damyp keledi. Buǵan árıne, memlekettik baǵdarlamalardyń tıgizip jatqan sharapaty mol. Sonymen qatar aımaqta óńirlik baǵdarlamalar da óz nátıjesin berýde. Mysaly, «Bereke-2» baǵdarlamasy aıasynda 2017 jyly Jambyl oblysynyń ákimdigi men «Damý» Qory qarajat pýlyn 1,0 mıllıard teńgege deıin ulǵaıtý týraly sheshim qabyldady. Onyń 500,0 mıllıon teńgesi Jambyl oblysynyń ákimdiginiń qarjy esebinen bolsa, al qalǵan 500 mıllıon teńge «Damý» Qorynan bólindi. Kórsetilgen qarajat 4 bankke ornalastyryldy. Nátıjesinde «Bereke-2» baǵdarlamasy sheńberinde 40 kásipkerdiń jobasy qarjylandyryldy.

Al 2018 jylǵy «Bereke-3» baǵdarlamasyn iske asyrý úshin 1,5 mıllıard teńge mólsherinde pýl quryldy. Onda 500,0 mıllıon teńge Jambyl oblysy ákimdigi qarajaty esebinen, al 1,0 mıllıard teńge «Damý» Qorynyń tarapynan bólindi. Bólingen qarajat ekinshi deńgeıdegi bankterde ornalastyryldy. Qazirgi ýaqytta bólingen qarajattyń 1 216 mıllıon teńgesi ıgerildi, onyń esebinen 45 kásipker jeńildetilgen nesıege ıe boldy.

О́ńirlik baǵdarlamanyń tıimdiligin eskere otyryp, Jambyl oblysy ákimdigimen osy baǵdarlamany aǵymdaǵy jyly jalǵastyrý týraly kelisimge qol jetkizildi.

Osylaısha, bıylǵy jyly "Bereke-4" baǵdarlamasyn iske asyrý úshin taǵy da 1,0 mıllıard teńge mólsherinde qarjy pýly quryldy, onda 500,0 mıllıon teńge ákimdik qarajaty esebinen, al 500,0 mıllıard teńge – «Damý» Qory esebinen bólindi. Qazirgi ýaqytta bólingen qarajat "Qazaqstan Halyq banki"AQ ornalastyryldy. Jalpy, «Bereke-4» boıynsha oblysta shamamen 40-qa jýyq kásipkerlerdi qarjylandyrý josparlanyp otyr.