Kásipkerlerge qoldaý kórsetilýde

Memleket basshysy Qasym-Jomart Toqaev «Syndarly-qoǵamdyq dıalog – Qazaqstannyń turaqtylyǵy men órkendeýiniń kepili» atty halyqqa arnaǵan Joldaýynda «Shaǵyn, ásirese, mıkrobıznes elimizdiń áleýmettik-ekonomıkalyq jáne saıası ómirinde mańyzdy ról atqarady. Atap aıtqanda, eń aldymen aýyl turǵyndaryna turaqty jumys beredi, jumyssyzdyqty azaıtady. Sonymen qatar salyq bazasyn qurap, jergilikti bıýdjetti nyǵaıtady. Sondaı-aq jappaı kásipkerlikti damytý sanaǵa sińgen paternalıstik pıǵyl men masyldyqtan arylýǵa múmkindik beredi. Elimizde kásipkerlikti damytýdyń úlgi bolarlyq mysaldary jetkilikti. Biz shaǵyn kásipkerlikti búkil qoǵam bolyp qoldaýymyz kerek»,– dep atap kórsetken bolatyn.

Búginde Jambyl oblysynda óz isin ashyp, jeke kásipke bet burǵandardyń qatary kóbeıip keledi. Bul turǵyda memleket tarapynan da tıisti qoldaý-kómek kórsetilýde. Mysaly, «Damý» kásipkerlikti damytý qorynyń Jambyl oblysy boıynsha aımaqtyq fılıaly janynan ashylǵan Kásipkerlikti qoldaý ortalyǵy búginge deıin 21 myńnan astam adamǵa keńes berip úlgergen.

Sonymen qatar ortalyq «Shaǵyn jáne orta bıznestiń top-menedjmentin oqytý» komponenti sheńberinde bilim alýǵa 108 kásipkerdi «Nazarbaev Ýnıversıtetine» jibergen. Onyń úsheýi bıylǵy jyly jiberilgen bolatyn. Sondaı-aq qazirgi tańda osy oqýǵa 16 kásipker ótinim berip, olar qyrkúıek aıynda bilimin shyńdady.

Oǵan qosa, aımaqtyq fılıal tarapynan Mobıldi Kásipkerlikti Qoldaý Ortalyǵy iske qosylǵan. Bul halyqqa keńes berý qyzmetterin kórsetý maqsatynda óńirlerge barýǵa arnalǵan arnaıy avtobýs. Mobıldi kásipkerlikti qoldaý ortalyǵy oblystyq kásipkerlik basqarmasy jáne óńirlik kásipkerler palatasynyń kelisimi boıynsha, keńes berý maqsatynda aı saıyn Jambyl oblysynyń aýdandaryna shyǵyp otyrady.

Sonymen qatar Jambyl jerinde basym jobalardy kredıtteý tetigi de qarastyrylǵan. Bul baǵdarlama 2018 jyldan bastap iske asyrylýda jáne ony iske asyrý kezinde Damý Qory kredıtter boıynsha syıaqy stavkasyn sýbsıdııalaý jáne kredıtterge ishinara kepildik berý quraldary boıynsha jeke kásipkerlik sýbektilerine qarjylyq qoldaý kórsete otyryp, qarjy agenttiginiń fýnksııalaryn júzege asyrady.