"Bıznestiń jol kartasy" boıynsha 800-den astam jambyldyqqa qoldaý kórsetildi

Prezıdent Q.Toqaev jýyrda óz Joldaýynda «Shaǵyn, ásirese mıkrobıznes elimizdiń áleýmettik-ekonomıkalyq jáne saıası ómirinde mańyzdy ról atqarady» deı kele «Sondyqtan memleket aldaǵy ýaqytta da bızneske qoldaý kórsete beredi. Bul maqsatqa Ulttyq qordan 100 mıllıard teńgege jýyq qarjy bólindi. Biraq sarapshylardyń pikirinshe, qarjylaı qoldaýdyń ıgiligin jergilikti bılikpen baılanysy bar sharýashylyqtar ǵana kórip otyr» degen bolatyn.

Osy oraıda «Damý» kásipkerlikti damytý qorynyń Jambyl oblysy boıynsha aımaqtyq fılıaly shaǵyn jáne orta bıznes ókilderin qoldaý baǵytynda júıeli jumystar atqarýda. Jalpy, «Damý» Qory memlekettik qoldaýdyń jan-jaqty jáne tıimdi quraldaryn engizý arqyly Qazaqstandaǵy mıkro, shaǵyn jáne orta kásiporyndardyń turaqty damýyn qamtamasyz etýge arnalǵan memlekettik qarjy ınstıtýty bolyp tabylady.

Qazirgi tańda, «Damý» Qory elimizde shaǵyn jáne orta kásipkerlikti damytýǵa arnalǵan birqatar memlekettik baǵdarlamalardy júzege asyrýda.

Atap aıtqanda, qor «Bıznestiń jol kartasy-2020» bıznesti damytý men qoldaýdyń memlekettik baǵdarlamasy, «Eńbek» nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy, О́ńdeýshi ónerkásip salasynda jumys isteıtin shaǵyn jáne orta kásipkerlik sýbektilerin qoldaý baǵdarlamasy, basymdyq berilgen jobalardy nesıeleý mehanızmi, «Bereke» óńirlik qarjylandyrý baǵdarlamasy syndy baǵyttar aıasynda tyń bastamalardy júzege asyrýda.

Bul baǵdarlamalar shaǵyn jáne orta bıznes úshin qarjylyq jáne qarjylaı emes qoldaýdyń túrli quraldaryn usynady.

Mysaly, «Bıznestiń jol kartasy-2020» bıznesti damytý men qoldaýdyń memlekettik baǵdarlamasy 2010 jyldan beri iske asyrylyp keledi jáne ony júzege asyrý barysynda Damý Qory qarjy agenttiginiń fýnksııalaryn oryndaıdy. Atap aıtqanda jeke kásipkerlik sýbektilerine nesıe boıynsha paıyzdyq mólsherlemelerdi sýbsıdııalaý jáne nesıelerdi ishinara kepildendirý quraldary boıynsha qarjylyq qoldaý kórsetip, sondaı-aq shaǵyn jáne orta bıznes jobalaryn qarjylandyrýǵa maquldaý alǵanǵa deıin konsýltasııalyq qyzmetter túrinde qoldaý kórsetedi. Baǵdarlama júzege asqannan beri Jambyl oblysynda 800-den astam kásipkerge qoldaý kórsetildi.